Дьокуускайга бааһынай ырыынагар олохтоох оҕуруотчуттар быйыл олох суохтарын тэҥэ.
Билэр дьонтон ыйыттахха, «атырдьах ыйын ортотуттан тахсыахтара, оҕуруот аһа дьэ ситэн-хотон эрэр» дииллэр.
Ол да иһин буолуо, биир-икки олохтоох дьон хортуоппуйдарын, оҕурсууларын сыаната — «абытай…» диэххэр диэри.
Сүбүөкүлэ сыаната эмиэ «ытырар». Сотору кэминэн чэпчиир ини диэн бэйэҕин уоскутаҕын.
Үгүс киһи сөбүлүүр кабачогун сыаната 100 солкуобайтан 60-70 солкуобайга диэри түспүт. 40 солкуобайга тиийэр ини диэххэ. Былырыын сыана 30 солкуобайга тиийэ түспүтэ.
Батсаапка соторутааҕыта сугуну былдьаспыт дьон видеота тарҕаммыта да, сугун баҕас ырыынакка дэлэй.
Алдан улууһуттан аҕалаллар эбит. Атыылааччылар этэллэринэн, күн аайы аҕала тураллар үһү. Онон былдьаһыы сибикитэ да суох.
Атын да отон арааһа элбэх. Сотору кэминэн бааһынай ырыынагар сыана түһэн, оҕуруот арааһа элбиир ини диэн эрэнэбит.
Елена ПОТОЦКАЯ, «Саха сирэ» хаһыат.
Хаартыскаҕа ааптар түһэриитэ.