«Ырыаларым — ымыыларым» куонкурус түһүлгэтигэр бастыҥнар түмүстүлэр
Горнай улууһугар, Бэрдьигэстээххэ, СӨ норуодунай артыыһа Раиса Захарова төрөөбүтэ 65 сылынан «Ырыаларым — ымыыларым» диэн өрөспүүбүлүкэ таһымнаах куонкурус ыытылынна. Ырыаны өрө туппут дьону түмэр үһүс төгүлүн тэриллибит түһүлгэ, өрүү буоларын курдук, сэргэхтик, үрдүк таһымнаахтык буолла дииллэр горнайдар.
Күөн күрэскэ Бүлүүттэн, Үөһээ Бүлүүттэн, Тааттаттан, Сунтаартан, Амматтан, Ленскэйтэн, Хаҥаластан, Чурапчыттан, Мэҥэ Хаҥаластан, Хатастан, Дьокуускай куораттан, Горнайтан барыта 66 ырыаһыт кыттыбыт. Ырыа мааны түһүлгэтигэр түмсүбүт күөн күрэс кыттыылаахтарын Саха сиригэр биллэр-көстөр баянистар, СӨ культуратын үтүөлээх үлэһиттэрэ Раиса Крылова, Алексей Калининскай-Луҥха Өлөксөйө, Михаил Егоров (Раиса Захарова быраата) доҕуһуоллаабыттар.
—Тэрээһиҥҥэ «Саха» НКИХ Горнайдааҕы филиала «Бэрдьигэстээх» ТВ ааспыт дьон-сэргэ сөбүлүүр ырыаһыта Раиса Захарова туһунан устубут биэриилэрин көрдөрүүтэ саалаҕа мустан олорооччулары улаханнык долгутта, уйадытта. Маны сэргэ, «Саха тапталлаах ырыаһыта — Раиса Захарова» диэн кинигэ сүрэхтэниитэ болҕомто киининэн буолла. Кинигэни хомуйан, оҥорон таһаарарга Раиса Захарова чугас дьоно, аймахтара, Розалия Семенова көҕүлээбит, түбүгүрбүт, сүүрбүт-көппүт дьонунан буолаллар. Долгутуулаах тэрээһиҥҥэ Раиса Яковлевна кыргыттара Анна, Раиса, ырыаһыт чугас дьоно, аймахтара уонна дойдулаахтара кыттыыны ылбыттара долгутуулаах биэчэри өссө ситэрэн-хоторон биэрдэ, истиҥ эйгэни үөскэттэ.
Салгыы сценаҕа бииртэн-биир ырыаһыттар тахсан ыллаатылар. Оттон көрөөччүлэр ытыстарын тыаһа уонна «Браво» хаһыылара өргө диэри ахсаабата.
Куонкурус түмүгүнэн спонсордартан уонна тэрийээччилэртэн өйдүү-саныы сылдьарга бэртээхэй бэлэхтэр, анал ааттар туттарылыннылар. Дипломаннар уонна лауреаттар ааттанан ытыс тыаһынан арыалланнылар. Гран-прины быйылгы күөн күрэскэ Горнай улууһун Кировскай нэһилиэгин олохтооҕо Айыына Харабаева ылан үөрүү-көтүү өрөгөйө буолла, — диир Айгылья Данилова.
Түгэнинэн туһанан, тэрийээччилэр бары кыттыбыт, өйөбүл буолбут дьоҥҥо норуот тапталлаах ырыаһыта, СӨ норуодунай артыыһа Раиса Яковлевна Захарова үтүө аатын үйэтитиигэ кыттыыларын иһин барҕа махталларын тиэрдэллэр.
СӨ норуодунай артыыһа, РФ үтүөлээх артыыһа Нина Чигирева, СӨ үтүөлээх артыыһа Анна Дьячковская, опера ырыаһыттарын аан дойдутааҕы куонкурустарын лауреата Зинаида Колодезникова, СӨ культуратын үтүөлээх үлэһитэ Данил Санников, өрөспүүбүлүкэтээҕи I куонкурус Гран-притын хаһаайына Иван Данилов дьүүллүүр сүбэҕэ олорон, бары куонкурустаһааччылар толорууларын сыаналаабыттар.
Биһиги корр., «Саха сирэ» хаһыат, edersaas.ru