Дьокуускай куоракка «Триумф» спорт дыбарыаһыгар Ороһуоспо күнүгэр ыытыллыбыт лотереялаах кэнсиэркэ хас даҕаны тыһыынча киһи сылдьыбыта. Ботуччу соҕус сыанатын да кэрэйбэккэ туран. Аны кулун тутардааҕы кэнсиэркэ эмиэ икки кыбартыыраны оонньотуохтаахтар үһү…
Анивера Акимова, «Саха сирэ» хаһыат, https://edersaas.ru/
Дьокуускай куоракка эрэ буолбакка, оннооҕор тыа кулууптарыгар лотереяны ыытыы «муодаҕа» кубулуйбута быданнаата. Супер-бириискэ арааһы бары туруораллар. Халыҥ үптээх-харчылаах, спонсордаах ырыаһыттар массыынаны, оннооҕор сылгы үөрүн оонньотоллор. Омук дойдутугар сынньанар путевка, төлөпүөн туһунан этэ да барыллыбат.
Бу күннэргэ Эстрада тыйаатырын артыыһа Эрхаан «Саха сирэ» эрэдээксийэтигэр киирэ сылдьан, бэрт интэриэһинэйи кэпсээтэ. Ол курдук, тыйаатыр артыыстара мунньахтаан, уопсай сүбэнэн лотереялаах кэнсиэри ыытартан аккаастаммыттар.
– Айар киэһэ тэрийэргэ артыыс үксүн «минуска» барар. Ночоокко тэбиллэр. Соторутааҕыта тыйаатыр артыыстара мустаммыт, мунньах тэрийэн, лотереялаах кэнсиэртэри ыытары тохтотор туһунан быһаардыбыт. Оттон лотереялаах кэнсиэркэ кыттарбытын салайааччыбыт Алексей Егоров, бобор кыаҕым суох диир. Биир бэйэм лотереяны утарабын. Кыбартыыра сүүйэ кэлбит киһи, биһиги ырыабытын истибэт буоллаҕа дии. Ыгылла-түүрүллэ, ньиэрбинэйдии олорор киһи онно эрэ наадыйбат. Санаата-оноото атыҥҥа сытар, – диэн Эрхаан этэр.
Түгэнинэн туһанан, Эрхаан олунньу 14 – 17 күннэригэр «VERSAILLES» музыкальнай салоҥҥа лотереята суох кэнсиэригэр ыҥырар.
Анивера Акимова, «Саха сирэ» хаһыат, https://edersaas.ru/
