Сунтаар туһунан ырыалар тиһигин быспакка сүрэхтэнэн, биир дойдулаахтарбыт ахтылҕаннарын таһаараллар.
edersaas.ru
Балартан биирдэстэрэ, күтүөппүт, «Өрөгөй» эр дьон ансаамбылын төрүттээччи, ырыаһыт, ырыа айааччы, урбаанньыт, Сунтаар улууһун теннис Федерациятын бэрэссэдээтэлин солбуйааччы Афанасий Никифоров Сунтаар туһунан айбыт ырыата буолар. Афанасий 60 сааһын төрөөбүт дойдутугар Кэбээйи Мукучутугар бэлиэтээтэ. Бу үтүөкэн үбүлүөйүн Сунтаартан спорт уонна култуура дьоно баран тэрийистибит. Кини аатынан өрөспүүбүлүкэтээҕи теннис күрэҕэ икки күнү быһа ыытылынна уонна «Дайан» КК айар кэнсиэрэ олохтонно.
Мукучу тыһыынчаттан тахса киһилээх, олус сайдыылаах, Бүлүү Хампатыттан 50- ча килэмиэтирдээх сиргэ турар эбит. Киэһэ хараҥарыыта тиийбит буолан уота-күөһэ, «Албан ааттар түһүлгэлэрэ» диэн сквер үөрэ көрсүбүтэ олус үчүгэй этэ. Баһылыктара иккис болдьоҕор талыллыбыт Анна Ивановна Сысоева дьахтар киһи буолан нэһилиэгин ыраастык, кичэллээхтик тутан олороро тутатына көстөр. Бу дойдуга хапсаҕай уонна волейбол сайдыбыт сирэ. Маныаха уоллара Афанасий теннис көрүҥүн сайыннарыыга төһүү буолар диэн үрдүк сыанаттан эттилэр. Бу улахан теннис күрэҕинэн уонна биир дойдулаахтарын үбүлүөйүнэн икки теннис остуола ылыллыбыт, ону кытта Афанасий биир остуолу нэһилиэгэр бэлэх уунна.
Үбүлүөйдээх ырыаһыт, спортсмен, урбаанньыт Афанасий Никифоров айар киэһэтэ тоҕус мэҥэ хамнаныыттан, Кураһаай Мэхээлэ алгыһыттан саҕаламмыта ураты сахалыы тыыннаах буолла. Ол кэннэ куораттан Исай Брызгалов, Уус Алдантан Василий Петухов, Сунтаартан «Өрөгөй» эр дьон ансаамбыла, Култуура салалтатын үлэһиттэрэ уонна ыытааччы Кириэстээхтэн Августина Платонова дьоро киэһэни киэргэттилэр. Кэнсиэр Сунтаар оһуокайынан түмүктэнэн бар дьону түмтэ. Бу үөрүүлээх күҥҥэ үбүлүөйдээх киһиэхэ Сунтаар улууһун баһылыгын «Спортка улахан өҥөтүн иһин», Улуус Мунньаҕын үрүҥ көмүс бэлиэлээх наҕараадата, култуура салалтатын «Сыана бэтэрээнэ» ааттар туттарылыннылар.
Сунтаардары үөрэ-көтө биир дойдулаахпыт Ия Им итии чэйинэн икки күн устата күндүлээбитигэр, Валентина Крамина, Мотрена Филиппова уонна Григорий Фомин сылаас дьиэлэринэн көмө буолбуттарыгар, ыччат лидерыгар Геннадий Николаевка, «Дайан» КК үлэһиттэрэ, чуолаан звукооператор уол Еремейга, «Дэриэбинэм» норуот тыйаатырын үлэһитигэр Саргыланаҕа «Герман» уонна баһылыкка Анна Ивановнаҕа эйэҕэстик көрсүбүттэригэр барҕа махталбытын биллэрэбит!
Кэбээйи уола, Сунтаар күтүөтэ ити курдук спорду уонна култуураны биир кэлимник тутан өрөгөйдөөх күнүн бэлиэтээтэ!
Мария КОБЕЛЬЯНОВА — ТУСКУЛААНА, edersaas сайтка анаан