Ырыа Саарын ыһыаҕы уруйдуур кэнсиэрэ

Бөлөххө киир:

“Туймаада ыһыаҕа -2020”  саха национальнай бырааһынньыга быйыл дистанционнайдык бара турар. Ол курдук, Дьокуускай куорат дьаһалтатын көҕүлээһининэн, бэс ыйын 8 күнүттэн саҕалаан, 8 жаанырынан 75 култуурунай бырагыраама дьон-норуот болҕомтотугар туһаайылынна.

Ол чэрчитинэн бэс ыйын 15 күнүгэр “Саха” НКИХ телеканалынан СӨ үтүөлээх артыыһа Александр Дьячковскай-Ырыа Саарын Үрүҥ Тунах ыһыаҕы көрсө, Саха сирин олохтоохторугар, “Уруйдан, Туймаадам!” Эҕэрдэ кэнсиэрэ буолла.

Кылыһахтаах, ураты кэрэ, сахалыы куоластаах Саарын бу киэһээ саамай бастыҥ ырыаларын дьоҥҥо-сэргэҕэ бэлэх уунна.

Ырыа Саарын  кэнсиэрэ саха норуота таптыыр, киэн тутта ыллыыр  «Сахам сирэ барахсан!» ырыанан саҕаланна. Салгыы,  дьон  сөбүлээн истэр “Саха уран санаата”, “Ханна көрдүм этэй…”, “Кырдал кыыһа”, “Үчүгэйиэн, алааспар”, “Арыллыы”,  “Манна тыаҕа, биһиэхэ”  уонна, биллэн турар, уостан түспэт  “Оһуор”  ырыаларын иһиттибит.

Бу курдук, СӨ Олоҥхо тыйаатырын артыыһа Александр Дьячковскай-Ырыа Саарын  быйылгы Туймаада онлайн-ыһыаҕын Эҕэрдэ кэнсиэрин аста.

Кэнсиэри Николь иилээн-саҕалаан бэккэ ыытта. Тэрээһин саҕаланыытыгар иһитиннэрбитин курдук, ыытааччы артыыска бэлэмнээбит соһуччу түгэннэрдээх буолла. Холобур, ыллыырын сэргэ, айар үлэтин туһунан ыйытыыларга хоруйдуурун таһынан, Александр Дьячковскай, сайыҥҥы өҥүрүк куйааска утаҕы ханнарар быыппах оҥоруутугар  бэйэтин ырысыабын үллэһиннэ. Онон, тэлэбииһэри көрөөччүлэр бу киэһээ, этэргэ дылы, “Саарын саамал кымыһын” билсистилэр.

Манан бүппэтэ, Саарыны өссө, төһө үчүгэй хаһаайын буоларын тургутан көрөөрү, мас хайыттаран көрдүлэр. Тыа сиригэр, Чурапчы Бахсытыгар төрөөбүт-үөскээбит, улааппыт киһи, ама, маһы хайытыа суоҕа дуо – Саарын “сорудаҕы” чаҕылхайдык толордо.

Ити курдук, Дьокуускайга Атласовтар уһаайбаларыгар ыытыллыбыт Ырыа Саарын  “Уруйдан, Туймаадам!” кэнсиэрэ үрдүк таһымҥа ыытыллан, сүргэни көтөхтө, дьиэҕэ олорор дьоҥҥо самаан сайын, ыһыах тыынын киллэрдэ.

Кэнсиэри манна көрүҥ:

Татьяна МАРКОВА

Видео — nvk-online.ru саайтан.

+1
0
+1
0
+1
0
+1
0
+1
0
+1
0
+1
0