“Тыыннаахтар умнубат сыллара” ырыаны онлайн толордулар 

Бөлөххө киир:

Саха Өрөспүүбүлүкэтин Ырыа айааччыларын сойууһа Улуу кыайыы 75 сылынан, ытыктабыллаах аҕа көлүөнэҕэ сүгүрүйэ, Тыыннаахтар умнубат сыллараырыаны (П.Одорусов хоһооно, Н.Бойлохов мелодията) күргүөмүнэн онлайн-ыллаан, дьон-норуот сэҥээриитин ылыан ылла.

edersaas.ru

Алексей ЕГОРОВ, саха норуодунай артыыһа, СӨ Ырыа айааччыларын сойууһун бэрэссэдээтэлэ:

Култуура үлэһиттэрэ, биллэн турар, таах олорбоппут. Биһиги дьоммут-сэргэбит, духуобунас, социальнай эйгэ туруктаах буоларын туһугар туруулаһан, үлэлии-хамсыы сылдьаллар. Ырыа айааччылар хас биирдии нэһилиэккэ да, куоракка да, саамай маассабай култуураны илдьэ сырыттахтара. Элбэх киһи кутун-сүрүн бүөбэйдээн, хуорга, ансаамбылга ыллатан, айымньылаах үлэни ыыталлар. Элбэх оҥоһулунна, оҥоһуллуо да турдаҕа.

Биһиги Екатериналыын, устуудьуйабыт оҕолорунаан, “Сэргэлээх сулустара,” “Сырдык сүүрээн” кыттыылаахтарын кытта ырыа үөрэтэбит, уонна, аныгы эйгэнэн, кэлэр оҕолору ыллатан баран, ону холбооммут, күргүөмүнэн ырыаны тэрийэбит…

Оттон Ырыа айааччылар сойууспутугар 90-тан тахса чилиэннээхпит. Бу, “Тыыннаахтар умнубат сыллара” ырыаны толорууга хуорга 40-тан тахса киһи кытынна.  Идиэйэтэ, сыала-соруга – дьон-сэргэ үчүгэй ырыа аргыстанан, ырыанан аралдьытынан, кэрэ эйгэҕэ сыстан, үөрэн-көтөн, этэҥҥэ, олоҕо туруктаах буоллун диэн… Ырыа – сүдү күүс! Ырыа – киһи аймах саамай үтүө, кэрэ, бэйэтин аралдьытынар эйгэтэ. Үрдүк Айыылар  киһи аймахха айан, туһулаан кэбиспит майгыларын тутан, дьон-сэргэ ырыанан туругуран, бэйэтин тупсарынар дии саныыбын.

Бу самоизоляция кэмигэр элбэх ырыа айылынна, хоһоон сурулунна. Үгүс өй-санаа сааһыланна. Онон, күндү бар дьоммутугар барыгытыгар эҕэрдэ! Сахабыт дьоно барахсаттарбыт, санааларын түһэрбэккэ, этэҥҥэ буолалларыгар баҕарабыт!

Татьяна МАРКОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0