Дьокуускай куоракка киһи тыыммат итиитигэр, Сэргэлээххэ бииргэ үөрэммит дьүөгэбит, СӨ үөрэҕириитин туйгуна, Үрүҥ Хайа, Анаабыр улууһун орто оскуолатын үөрэх чааһыгар дириэктэри солбуйааччы Ирина Петровна Спиридонова бырааттарын айар киэһэлэригэр ыҥырар биллэриини ыыппыта.
Биһиги Хатаска «Тускул» культура киинигэр бырааттыы Афанасий, Анатолий Колочевтар «Дууһабын аһан» диэн ааттаах айар киэһэлэригэр үөрүүнэн сырыттыбыт. Колочевтар ийэлэрэ, аҕалара олус музыкальнай дууһалаах ыаллар эбит. Оҕолор кыраларыттан олус ырыаһыттар. Бырааттара Анатолий үһүс сылын ырыанан дьарыктанар, айар кэнсиэрин ыыппыт. Афанасий саха сиригэр биллэр логопед учуутал, СӨ ИДьМ иһинэн үҥкүү ансаамбылын салайар, «Саха» НКИХ устар сериалын артыыһа.
Биһиги Ирабытыгар төннөн эттэххэ, Сэргэлээххэ үөрэнэ сылдьан, Хатаска саха салаатын 79 сыллааҕы устудьуоннара бырааһынньык аайы тахсан хонон, ыал минньигэс аһын аһаан, сэргэхсийэн киирээччибит. Ира Анаабыртан уоппускаҕа кэллэҕинэ мэлдьи көрсүһэр үтүө үгэстээхпит. Ира кэргэнэ Гавриил өрөспүүбүлүкэҕэ биллэр мелодист, Дьокуускай куоракка эмиэ буһарык куйааска «Дуораан» устуудьуйаҕа кэнсиэригэр сылдьан, ырыаһыт күтүөппүтун астына көрбүппүт.
Бу сүргэни көтөҕөр бэртээхэй кэнсиэргэ бырааттыы Афанасий, Анатолий ылбаҕай ырыаларын астына иһиттибит.
Марта Николаева,
Дьокуускай