Ырыа Күнүн сырдык сыдьаайа

Бөлөххө киир:

Бар дьон баҕа санаатын толорон, ыам ыйын 19 күнүгэр, бүтүн Саха сирин үрдүнэн  быйыл алтыс төгүлүн Ырыа күнэ буолан ааста. Бу Күн, кырдьыга даҕаны, уустук, ыарахан кэмҥэ дьон сомоҕолоһуулаах, түмсүүлээх буоларын биллэрдэ.

edersaas.ru

Өрөспүүбүлүкэ  киин куоратын сүрүн болуоссатыгар оҕолор, эдэр ыччат, орто саастаах,  аҕам  саастаах дьон муһунна. Тыһыынчанан киһилээх хор төрөөбүт дойдубут туһунан ыллаан дуоратта.

Күргүөм ырыа күөрэччи тахсыбыт дорҕооно көмүөл күүһүнүү аламаҕай санаалаах айыы дьонугар күүстээх булгуруйбат санааны сахта.

Улуус улуус аайы мустан, оройуон оройуон аайы тоҕуоруһан, бииргэ буолартан дуоһуйууну, уоскуйууну, астыныыны биллилэр. Ырыанан арыалламмыт олох  мэлдьи сырдык сыдьаайданар, сылаас тыыннанар. Дьон,  сарын сарынтан өйөһөн, тоҥолох тоҥолохтон тутуһан, илии илииттэн ылсыһан, күүһүгэр күүс эбинэр.

Махтанабыт бар дьоммутугар,  ардаҕы аннынан, ибири-сибири сииги-силбиги уйан, көрөөччүлүүн толорооччулуун тэтимҥит тэҥнэһэн, таһымҥыт тахсан, биир дьиэ кэргэн курдук үгүрү -сүгүрү буолбуккутугар. Тоһоҕолоон тохтоон ааһыахпын баҕарабын дьулуурдаах -дьүккүөрдээх, тулуурдаах, тууһугуран туран үлэлиир, холобур буолар маяк киһибитигэр — Луҥха Өлөксөйгө уонна кини  тапталлаах кэргэнигэр, музатыгар Варвара Иннокентьевнаҕа.

Бу дьиэ кэргэн ил гынар иллээх тыынынан, күүстээх санаатынан, сынньанары билбэккэ сыралаһан, туруоруммут сыалбыт хайаан даҕаны  туолуо, биһиги бары ыра гыммыт Ырыабыт Күнэ баар буолуо.

Наталья Руфова,

Хатастааҕы “Тускул” КК уус-уран салайааччыта,

Ырыа Күнүн тэрийсээччи. 

+1
0
+1
0
+1
0
+1
0
+1
0
+1
0
+1
0