Саха сирэ — ырыа куттаах дойду. Бу туһунан Арассыыйа бэрэсидьиэнэ Владимир Путин эфиргэ аһаҕастык этэн, хайҕаан турар. Ырыа аргыстаах буолан, Саха сирин дьоно тыйыс тымныыны, олох очурдарын тулуйан, кэскил туһа диэн айар-тутар, ил-эйэ олохсутар дьүккүөрдээх.
Саха сирин Бастакы бэрэсидьиэнэ Михаил Николаев «Муусука — барыбытыгар» диэн хамсааһыны тэрийбитэ бэһис сыла туолла. Бу ыччаты иитэргэ кэскиллээх, суолталаах тэрээһин дьиҥ төрдө норуот ырыаҕа тапталыгар, ырыанан сомоҕолоһоругар тирэҕириэхтээх. Манна даҕатан эттэххэ, Арассыыйаҕа ырыа суолтатын сытыытык туруоран, оскуола аайы хоровой кэлэктииптэри тэрийэргэ дьаһал ылылынна.
“Айылҕабыт уонна айылгыбыт ураты дьүөрэлэһиитин бөҕөргөтөр судаарыстыбаннай суолталаах ырыаҕа аналлаах хамсааһыны төрүттүүргэ уолдьаста”, — диэн туран, СӨ Ырыа айааччыларын сойууһа, “Дьүһүй” сахалыы ырыа кулууба, Саха сирин мелодистара “Ырыа күнүн олохтуохха” диэн ыҥырыы таһаардылар. Бу ыҥырыыга ырыаны таптааччы, тарҕатааччы 14 тыһыынчаттан тахса киһи илии баттаата.
“Нэһилиэнньэ бэйэтин көҕүнэн, хайыы үйэ 6-с сылын улуус-улуус аайы ыам ыйын 21 күнүгэр “Ырыа күнүн” тэрийэн-бэлиэтээн, ыллаан-туойан сэргэхсийэр. Дьоммут кэрэҕэ дьулуурдарынан санааларын түмэр, бөҕөргөтөр, сомоҕолоһор Күннэрин Аҕа баһылык ыйааҕынан бигэргэтэр кэм кэллэ дии саныыбыт”.
Алексей Калининскай,
мелодист.