Саха нарын ырыатынан, кэрэ матыыбынан доҕуһуоллатан, дьахталлар доруобуйаларын тупсарар биир сонун ньымаланнылар.
edersaas.ru
Культуролог идэлээх Ирина Федорова “Сахаэтнофитнесс» бырайыагы тэрийэн үлэлэппитэ икки аҥаар сыл буолла.
Бу кэм устата араас хайысхалаах үлэ күөстүү оргуйар. Интэриэһинэйэ баар, дьарык саха үҥкүүтүн төрүт хамсаныыларыгар олоҕурар. Ол курдук, дьикти кэрэ матыыптарга уйдаран, араас хамсаныыны оҥорон, саха дьахтарын сүргэтэ көтөҕүллэр, сэргэхсийэр, чэбдигирэр.
Дьарык хамсаныылара олус табатык аттарыллыбыттар. Бастаан бытаан муусуканан эти-сиини уһугуннарыыттан саҕалаан, устунан сиртэн тэйэн-тэбэн, дьиэрэҥкэйдээн ылыллар. Киһи илиитин элбэхтик көтөҕөр. Ол ордук олорор үлэлээх дьоҥҥо олус туһалаах. Сахалыы хамсаныылар айылҕаттан уратытык сааһыламмыттар. Киһи ыгылыйбат, өрө күүрбэт. Үҥкүү хамсаныыларын көмөтүнэн дьахтар киһи күннээҕи түбүктэн тэйэн, санаатын ыраастанар, көҥүллүк тыынарга үөрэнэр. Маныаха этиҥ-сииниҥ эрчиллэр, олоххор саҥа сүүрээни киллэрэн, дууһаҕар эрэл үөскүүр. Ол да иһин, «сахаэтнофитнескэ» кэлбит киһи сирэйдиин сырдыыр, сөҕөр-махтайар, дуоһуйууну ылар.
Билигин өрөспүүбүлүкэ үрдүнэн 800 тахса дьахтар-аймах сахалыы муусукаҕа, үҥкүү хамсаныыларыгар сөбүлээн дьарыктанар буолла. Саҥа дьарыктанааччыларга — “Иэхэй -чуохай “, сылтан ордук сылдьааччыларга — “Нарыммын “, уһуйаан кырачааннарыгар — 15 мүнүүтэлээх, оскуола оҕолоругар — 1 чаас 10 мүнүүтэлээх “Кэрэчээнэбин“ диэн түһүмэхтэр нэһилиэнньэ араас араҥатын нэдиэлэҕэ үстэ хабар буоллулар. Быйыл сонун сүүрээн быһыытынан саха оскуолаларыгар, кылаастарыгар араас хамсаныылардаах эрчимирдэр тохтобуллар киирэн эрэллэр. Бырайыагы улуустарынан анал инструктордар тарҕаталлар.
Ол курдук, Чурапчыга, Хатылыга, Одьулууҥҥа, Намҥа, Хатырыкка, Хаҥалас улууһун Булгунньахтааҕар, Өктөмҥө, Тиит Арыыга, Мэҥэ Хаҥалас Майатыгар, хоту улуустартан ыраах Дьааҥы улууһун Бөтөҥкөһүгэр, Таатта Чөркөөҕөр, Тыараһаҕа, Уус Алдан Бороҕонугар, Бэйдиҥэҕэ, Тумулга маастар-кылаастар ыытыллан, «сахаэтнофитнесс» бөлөхтөрө ситиһиилээхтик үлэлииллэр.
Бу доруобуйаны бөҕөргөтүүгэ олус туһалаах үлэни ыытар түмсүүлэр чөл олоҕу тутуһарга ыҥыран, нэһилиэк, улуус олоҕор сонун сүүрээни киллэрсэн, дьону-сэргэни үтүөҕэ, кэрэҕэ, сырдыкка угуйаллар.
Раиса ГОРОХОВА,
Дьокуускай к.
«Саха сирэ» хаһыат, edersaas.ru саайтка анаан.