Саха сирин норуоттарын муусукатын уонна фольклорун түмэлигэр композитор-мелодист, СӨ култууратын үтүөлээх үлэһитэ, СӨ профессиональнай үөрэхтээһинин туйгуна, «Сибэкки биһикки» духуобунас скверин, өрөспүүбүлүкэҕэ «Ырыа күнүн» бырайыактар, «Дьүһүй» сахалыы ырыа кулуубун ааптардара, тэрийээччитэ А.К.Калининскай-Луҥха Өлөксөй 65 сааһын көрсө айар үлэтин кэрэһэлиир «Ырыам айар куйаара…» быыстапката олус сэргэхтик барда, дьону-сэргэни түмтэ.
Быыстапкаҕа А.Калининскай олоҕун уонна айар үлэтин сырдатар араас сыллардааҕы хаартыскалара, кинигэлэрэ, ырыаларын дискэлэрэ, оонньообут байаана, кэнсиэргэ кэппит көстүүмнэрэ, сыралаах үлэтин сыанабыла-наҕараадалара, уо.д.а. үлэтин-хамнаһын көрдөрөр, кэпсиир мал-сал бар дьон көрүүтүгэр туруорулунна.
Тэрээһин биир күнүнэн муҥурдаммата. Хас да күн устатыгар ырыаны сэҥээрээччилэр, ырыаһыттар, А.К.Калининскай айар үлэтин сыаналааччылар быыстала суох түмэлгэ кэлэ турдулар. Аймах-билэ дьоно, доҕотторо, учууталлара, Тулагыттан ансаамбыл, Кэбээйи түмсүүтэ, Аҕыйах ахсааннаах хотугу норуоттар ассоциацияларын чилиэттэрэ, Алексей Кириллович өр кэмҥэ үлэлэспит доруобуйаларынан хааччахтаах ырыа кэрэ эйгэтигэр дьарыктаммыт дьон, о.д.а. кэлэн ыалдьыттаатылар, санааларын үллэһиннилэр, үөрүүнү үксэтистилэр. Сылдьыбыт ыалдьыттар бука бары быыстапканы сөҕө, хайгыы көрдүлэр, улаханнык сэҥээрдилэр. Луҥха Өлөксөйү кытары атах тэпсэн олорон сэһэргэстилэр, ыйытыыларыгар хоруйдары ыллылар, эбиитин ааптары кытары тэҥҥэ ыллаан-туойан улаханнык астыннылар. Онон ырыа-тойук аргыстаах быыстапкаттан дьон-сэргэ сүргэлэрэ улаханнык көтөҕүлүннэ. А.К.Калининскайга махталларын тиэртилэр, кэлэр да өттүгэр маннык тэрээһин буола турарыгар баҕардылар.