Емельян Ярославскай аатынан Хоту дойду норуоттарын устуоруйаларын уонна култуураларын Дьокуускайдааҕы судаарыстыбаннай холбоһуктаах мусуойугар тус хоту сытар Аллайыаха улууһун “Аллаиха: прошлое и настоящее – для будущего” диэн САССР 100 сылыгар анаммыт көһө сылдьар быыстапката үлэлии турар. Манна “Родимый уголок земли – любимый мой Оленегорск” диэн биир дойдулаахтар көрсүһүүлэрэ буолан ааста.
Тэрээһин кыттыылаахтара Судаарыстыбаннай диэйэтэл Е.Н.Горохова туттубут малларын көрдүлэр. Кини аатын кытта Оленегорскайга оскуоланы тутуу, табаны иитии сайдыыта ыкса сибээстээх. А.П.Трайзе тикпит национальнай эбээн көстүүмнэрин, эбээн култууратын тарҕаппыт уонна кыраайы үөрэтээччи Е.В.Едукин, тыыл бэтэрээнэ А.Г.Щелканова, уордьаннаах биир дойдулаахпыт Г.Н.Щелканов туһунан үгүһү биллибит.
РСФСР Миниистирдэрин сэбиэтин көһө сылдьар Кыһыл знамятын таһыгар хаартыскаҕа түстүбүт. Бу знамя “Оленегорскай” сопхуос кэлэктиибигэр Бүтүн Арассыыйатааҕы социалистическай күрэхтэһиигэ 1986 сыллаахха кыайыытын иһин туттарыллыбыта уонна нэһилиэк киэн туттуутунан буолар.
Бу үөрүүлээх түһүлгэҕэ Оленегорскайга араас сылларга үлэлээн ааспыт дьон ол кэмнэрдээҕи сыллар тустарынан ахтан-санаан аастылар. Хайдах курдук пионер уонна хомсомуол, нэһилиэк олоҕор кыттыбыттарын кэрэхсэбиллээхтик кэпсээтилэр. Трофимова В.И., Лебедева Л.Х., Дьяконова М.В., Огонерова В.В., Едукин А.Е., Лебедева А.Д., Халтурина О.В., Бережнова С.С. уонна мин дьоһун ахтыылары оҥордубут. Виктория Ивановна, Аркадий Егорович “Ойоотун” ырыанан истиҥ эҕэрдэлэрин тириэртилэр.
Юкагирскай национальнай нэһилиэк дьаһалтатын баһылыга Г.П. Кривошапкина биир дойдулаахтарыгар быыстапкаҕа кэлбиттэрин иһин махтанна уонна өйдөбүнньүк үбүлүөйдээх сувенирдары, махтал суруктары туттарда. Кини үбүлүөйдээх тэрээһиннэр сыл устата буолалларын, үбүлүөй ыһыаҕа бэс ыйыгар былааннаммытын эттэ. Туундара уонна булт сонорун мусуойун дириэктэрэ А.Д.Лебедеваҕа уонна мусуой үлэһитэ Л.Х.Лебедеваҕа бу дьоллоох Дьокуускай куоракка тэрийбит быыстапкаларыгар түмсэллэригэр көмөлөспүттэрин иһин истиҥ махталын тириэртэ. Онон ырыаҕа ылламмыт, хоһооҥҥо хоһуллубут Оленегорскайтан төрүттээхтэр, онно үлэлээбит дьон мустан, сүрдээҕин сэргэхсийэн, үөрэн-көтөн тарҕастыбыт. Тапталлаах Оленегорскайбыт сайда, чэчирии туруо диэн эрэнэбит.
Любовь Щелканова, Дьокуускай к.
Хаартыскалары: Д.В.Щелканова түһэриитэ