«Үрдэл» — ыччат сайдар киинэ

Ааптар: 
Бөлөххө киир:

Бүлүүтээҕи педагогическай колледжка өрөспүүбүлүкэ бары улуустарыттан учуутал уонна уhуйааччы идэтин баһылаары, 700-тэн тахса ыччат  күнүскүгэ уонна кэтэхтэн үөрэнэр.  Кинилэр 11-ис уонна 9-ус кылаас кэнниттэн киирэннэр, 8 араас идэҕэ үөрэнэллэр. Ол курдук, колледжка   алын кылаас учууталлара, уһуйаан иитээччилэрэ, доруобуйаларынан хааччахтаах оҕолору кытта үлэлэһээччилэр, физкультура учууталлара уонна техник-программистар уһаарыллан тахсаллар. Колледж иһинэн үлэлиир «Үрдэл» киин үчүгэй бэлэмнээх учууталы эрэ буолбакка, айар дьоҕурдаах,  дэгиттэр сайдыылаах оҕолору уһуйан таһаарар.

“Айылгы” куруһуок ситиһиитэ муҥура суох

Киин иһинэн араас түмсүүлэр үлэлииллэр. Олортон биир бастыҥнарынан “Айылгы” ырыа-үҥкүү кэлэктиибэ буолар. Салайааччынан  Варламова С.М. уонна Томскай В.В. үлэлииллэр. Кэлэктиип Индияҕа, Москваҕа, Казаньҥа уонна араас аан дойду таhымнаах бэстибээллэргэ кыттыыны ылар. Холобура, “Арассыыйа сомоҕолоһуута”, “Саха сирин кыһыҥҥы көстүүтэ”, “Култууралар калейдоскоптара”,  “Хотугу Кустук”, “Түһүлгэ”  бэстибээллэргэ бастыҥ аатын сүкпүттэрэ.

“Сандаара” муода устуудьуйата үлэлиир

Иистэнньэҥнэр уонна иистэнэ үөрэниэн баҕалаах устудьуоннар 2-ис сылын үлэлиир «Сандаара» муода устуудьуйатыгар дьарыктаналлар. Устудьуоннар кылтан, таба муоһуттан, оҕуруонан уонна таҥаһынан дьэрэкээн киэргэллэри оҥорон араас куонкурустарга ситиһиилээхтик кытталлар. Светлана Мытник салайар “Сандаара” куруһуок иитиллээччилэрэ өрөспүүбүлүкэ, Арассыыйа уонна норуоттар икки ардыларынааҕы куонкурустарга ситиһиилээхтик кыттыбыттара.

Устудьуоннар ырыанан утумнаахтык дьарыктаналлар

Колледж устудьуоннара уруккуттан көмүс куоластаах ырыаһыттарынан биллэллэр. “Үрдэл” иһинэн хас да ырыа бөлөҕө баар. Ол курдук, Нестерова Р.. салайааччылаах «Дэгэт», Павлова А.З. “Уйулҕа” уолаттар уонна “Кырыымпа” кыргыттар бөлөхтөрө олус дьаныардаахтык эрчиллэн, ситиһиилэрэ баһаам. Икки сыл ыытыллыбыт “Алтын-Майдан” аан дойдутааҕы бэстибээл лауреаттарынан буолбуттара. Колледж Саха Өрөспүүбүлүкэтин бастакы бэрэсидьиэнэ Михаил Николаев төрүттээбит «Муусука — барыбытыгар» бырайыагар көхтөөхтүк кыттар. Сүрүн үөрэх таhынан, Евдокимов Е.Е. салайааччылаах «Тэтим» вокально-инструментальнай бөлөх устудьуоннары дьарыктыыр.  «Тэтим» бөлөх кулун тутарга Саха Өрөспүүбүлүкэтин Култуураҕа уонна духуобунаска сайдыытын министиэристибэтин кытта  саха бастакы профессионал композитора Марк Жирков 125 сыллаах үбүлүөйүгэр аналлаах   вокально-инструментальнай өрөспүүбүлүкэтээҕи куонкуруһу ыытта уонна үгэскэ киллэрдэ.

Уолаттары байыаннай дьыалаҕа уһуйаллар

Үгүс уол оҕо аармыйаҕа сулууспалыырын куттанар буолла. Ол иһин, уолаттары байыаннай дьыалаҕа сыһыарар «Хорсун» кулуубу физкултуура салаатын устудьуона Айаал Петров таһаарыылаахтык салайарын бэлиэтиир тустаахпыт. Кулууп улуус байыаннай комиссариатын кытта араас күрэхтэһиилэри, хомуурдары уонна тэрээһиннэри тэрийэр.

Бэйэни салайыныы элбэҕи эрэйэр

Колледжка араас улуус оҕолоро үөрэнэр буоланнар, улуустарын түмсүүтүн тэрийэн үлэлэтэллэр. Холобура, “Күөх Ньурба”, “Кэбээйи”, “Хотун Бүлүү”, “Боотуруускай”, “Сунтаар Түмэн”, “Орончикан” уонна да атын улуустар түмсүүлэрэ баар. Маны таһынан, устудьуоннар профсоюзтара, «Эрчим» спортсменнар сүбэлэрэ, уопсай бэйэни салайыныыта, «ЭКОLINE» экология түмсүүтэ,  «Төлөннөөх сүрэхтэр»  педагогическай этэрээт курдук түмсүүлэр колледж уопсастыаыннай  олоҕун оҥороллор. Колледж иһинэн ыытыллар тэрээһиннэри киһини сөхтөрөрдүү тэрийэн ыыталлар. Бэйэлэрин көрдөрбүт лидер ыччаттар маҥнайгы кууруска кэлбит оҕолорго сүбэлээн-амалаан, колледж олоҕор киллэрэллэр.  Саҥа үөрэх сылын көрсө, бэйэни салайыныы көхтөөх кыттааччылара “Дьаарбаҥка” тэрийбиттэрэ. Бу тэрээһиҥҥэ саҥа кэлбит оҕолор бэйэлэригэр сөптөөх куруһуокка, кулуупка уонна бөлөххө суруттардылар. Оттон ааспыт сылга бэйэлэрин үчүгэйдик көрдөрбүт оҕолорго анал харчынан бириэмийэ туттардылар.

Улахан таһымнаах тэрээһиннэргэ көхтөөхтүк кытталлар

“Үрдэл” киин үлэтэ колледж иһинэн эрэ муҥурдаммакка, араас үөрэх кыһаларын кытта шефтэһэр.  2016 сылга 16  устудьуон  Элистаҕа тиийэн Б.Б. Городовиков аатынан Калмыкиятааҕы Судаарыстыбыннай үнүбүрсүтүөккэ Бүлүү колледжын күннэрин үрдүк таһымҥа тэрийэн кэлбиттэрэ. Көрсүһүү түмүгүнэн, Калмыкиятааҕы үнүбүрсүтүөккэ хас да оҕо кэтэхтэн үөрэххэ киирбитэ. Ааспыт сыл алтынньытыгар колледж иитиллээччилэрэ XIX аан дойдутааҕы ыччат уонна устудьуон бэстибээлигэр аналлаах Москваҕа ыытыллыбыт парадка кыттыыны ылбыттара устудьуоннаабыт сылларыгар умнуллубат түгэн буолла. Маны таһынан, Санкт-Петербург куоракка баар Герцен аатынан үнүбүрсүтүөккэ ыалдьыттаан семинардарга сырыттылар. Бу күһүн улуу суруйааччы Николай Чернышевскай 190 сааһын туолар тэрээһинигэр Бүлүү колледжын устудьуоннарын Саратов куоракка ыҥырдылар. Бачча ыҥырыыны туппут дьон тэрээһиҥҥэ бэлэмнэниилэрин номнуо саҕалаабыттара.   

 Светлана Мытник, «Үрдэл» киин салайааччыта. 

+1
0
+1
0
+1
0
+1
0
+1
0
+1
0
+1
0