ХИФУ Арктикатааҕы инновационнай киинин уонна “Якутия” технопаарка резиденэ Николай Потапов “Арассыыйа тимир суоллара” хампаанньаны кытары докумуоҥҥа илии баттаста. Кини оҥорбут дезинфектор-роботын хампаанньа Уһук Илиҥҥэ баар бары вокзалларыгар туһаныахтара. Аан бастаан Нерюнгригэ ахсынньы 27 күнүгэр роботы ыытыахтара.
— Тиэхиньикэбитин Нерюнгригэ номнуо ыыттыбыт. Бастаан станция иһин, үлэһиттэрин үөрэтиэхпит, үлэбитин саҕалыахпыт. Уһук Илиннээҕи тимир суол начаалынньыга Николай Маклыгин биһиги технологическай кыахпытын билэр, бииргэ үлэлэһэргэ бэлэм. Робоппыт Нерюнгригэ олунньу 7 күнүгэр диэри үлэлиэҕэ. Туох эрэ итэҕэстээх буоллаҕына, тута көннөрөн иһиэхпит, — диэн Николай кэпсиир.
Бу кэтээн көрүү, чинчийии кэнниттэн, Уһук Илиҥҥэ баар бары вокзалларга анаан хампаанньа ыраастыыр, дезинфекциялыыр роботтары муус устарга атыылаһар былааннаах.
“Арассыыйа тимир суоллара” хампаанньа үлэһиттэрэ бу бырайыагынан Дьокуускайга буолбут “Стартап-дело” бырагыраама үлэтин кэмигэр билсэн, интэриэһиргээбиттэрэ уонна Николай Потаповы Хабаровскайга ыҥырбыттара. Ахсынньы 18 күнүгэр көрсүһэн, робот тугу сатыырын, кыаҕын көрдөрбүттэрин түмүгэр, Саха сиригэр оҥоһуллубут IT-бородууксуйа атыылаһааччытын булла.
Ангелина Васильева, “Саха сирэ” хаһыат, edersaas.ru