Бүлүү бөлөх улуустарын уонна Мииринэй оройуонун Сүлдьүкээр, хоту Эдьигээн нэһилиэгин олохтоохторун 2019-2024 сылларга СӨ бырабыыталыстыбата быйыл муус устарга бигэргэппит бырагырааматын чэрчитинэн, ыраас уунан хааччыйыахтара. Бу бырагырааманан 29 нэһилиэккэ 21 ууну оботторор ыстаансыйа, ууну ыраастыыр 30 тэрил, ону таһынан, 104 км уһуннаах уу турбатын ситимэ оҥоһуллуоҕа. Итиниэхэ 1,937 миллиард солкуобай көрүллүбүтүттэн 837 мөлүйүөнүн «АЛРОСА» хампаанньа уйунуо.
От ыйын 16 күнүгэр Ил Дархан Айсен Николаев Үөһээ Бүлүүгэ ууну оботторор ыстаансыйа хайдах үлэлиирин бэрэбиэркэлээтэ. 2009-2017 сылларга маны СӨ ОДьКХ тэрилтэтэ үлэлэппитэ, онтон 2018 сыллаахха Үөһээ Бүлүү нэһилиэгин хомунаалынай хаһаайыстыбатын тупсарыынан дьарыктанар тэрилтэҕэ биэрбиттэрэ.
Быйыл ууну оботторор тэрили өрөмүөннээбиттэрин кэнниттэн, иһэр уу хаачыстыбата тупсубут. «Күн бүгүн уу санитарнай ирдэбилгэ эппиэттиир эрээри, ааспыт үйэ эргэрбит технологиятын туттар табыллыбат. «АЛРОСА» хампаанньа үбүлээһининэн ууну ыраастыыр аныгы тэрили туруоруу, ыстаансыйаны саҥардыы Бүлүү бөлөх улуустарын ыраас уунан хааччыйар бырагыраама чэрчитинэн сотору оҥоһуллуо», — диэн эттэ Айсен Николаев.
Марианна Тыртыкова, «Саха сирэ» хаһыат, edersaas.ru
+1
+1
+1
+1
+1
+1
+1