Коронавирус иккис долгуна Саха сиригэр олус дохсуннук кэллэ. Саас сууккаҕа ортотунан 30 -40 киһи ыалдьар эбит буоллаҕына, билигин күҥҥэ сүүстэн тахсалыы киһи өрөспүүбүлүкэҕэ ыалдьар.
edersaas.ru
Дьаҥ кэмигэр социальнай ситимнэргэ дьон быраастар хайдах көрбүттэрин, анаалыс хас хонугунан биллибитин туһунан суруйаллар, санааларын үллэстэллэр. Мин эмиэ тус санаабын суруйарга сананным. Дьон тоҕуоруһар сиригэр сылдьыбат эрээри, биир күн оҕом күүскэ температуралаан соһуччу ыарыйда. Дьиэ иһигэр, салгын сииргэ бары санитарнай ирдэбили тутуһа сылдьар киһи, тута кутталбыттан 103 нүөмэргэ эрийэн суһал көмөнү ыҥырдым. Миэхэ суһал көмө оҕо бырааһын нүөмэрин биэрдилэр. Сүбэлээтилэр. Сарсыныгар учаскуобай быраас кэлэн көрдө. Маҥан таҥастаах, мааскалаах, бэрчээккилээх мэдиссиинэ үлэһитэ киирдэ. Киирии аан таһыгар туран, таһыттан киирбит бэрчээккитин барбах антисептигынан ыстарбыта буолла. Көтөҕөн аҕалбыт оҕом айаҕын атытан көрдө. Бэрчээккигин уларыттыбаккын дуо диэн ыйытыыга антисептик баар диэн хоруйдаата. Эмп анаата, иһиллээтэ.
Билигин кытаанах эрэсиим кэмигэр быраастар түүннэри-күнүстэри үлэлииллэр, ол эрээри аан тутааҕын тутан киирбит илиитинэн ол күн хас киһи айаҕын көрбүтэ биллибэт. Онуоха антисептик чахчы туһалыыра буолуо дуо? «Ыраас «кирдээх бэрчээккинэн ыарыы тарҕаныыта элбиэ суоҕа дуо?
Ульяна Захарова, edersaas.ru