Сүрүн Уопсастыба

«Ыраас Арктика» — Саха сиригэр

Бу күннэргэ «Ыраас Арктика» федеральнай бырайыак чэрчитинэн арктическай эрэгийиэннэргэ  2 тыһыынчаттан тахса баҕа өттүнэн үлэлиир дьон 1500 туонна бөдөҥ хаарбах бөҕү-сыыһы хомуйдулар.

Бу туһунан  куйаар ситиминэн буолбут РФ Федерация Сэбиэтин мунньаҕар түмүгү таһаарыыга бэлиэтээтилэр. Мунньахха сылдьыбыт РФ Бэрэсидьиэнин иһинэн үлэлиир СӨ Бастайааннай Бэрэстэбиитэлэ – СӨ бырабыыталастыбатын Бастакы солбуйааччы Андрей Федотов иһитиннэрбитинэн, Саха сирэ бу суолталаах тэрээһини биир бастакынан өйөөбүт эрэгийиэнинэн буолар. Бырайыагы олоххо киллэрии Саха сиринээҕи оробуочай бөлөҕүн  Ил Дархан Айсен Николаев салайар.

— Атырдьах ыйыгар Булуҥ улууһун Тиксии бөһүөлэгэр  волонтердар олохтоохтору уонна байыаннай сулууспалаахтары кытта  субуоттунньуктаан, 300 туонна хаарбах бөҕү хомуйбуттара. Бу бөһүөлэги маннык үлэнэн 2022-2023 сылларга тимир бөхтөн босхолуур сорук турар, — диэн Андрей Федотов бэлиэтээтэ. Хомуллубут ыарахан таһаҕас бааржаҕа куруустанан, уунан Аллараа Бэстээххэ тиэрдиллэн баран, тимир суолунан дойду  металлургическай собуоттарыттан биирдэстэригэр утаарыллар.

Федерация Сэбиэтин  бэрэссэдээтэлин солбуйааччы Галина Карелова иһитиннэрбитинэн, бырайыак кыттааччылара быраап боппуруостарыгар  уустуктары көрсүбүттэр. Онон тохсунньу бүтэһигэр диэри сокуоҥҥа нормативнай-правовой аакталары үөрэтии соруга турар.

“Ыраас дойду” эрэгийиэннээҕи бырайыак чэрчитинэн «Экология»  национальнай бырайыагы олоххо киллэриигэ Усуйаана оройуонугар  Кулаардааҕы ЗИФ-тан хаалбыт улахан хаарбах бөҕү-тимири хомуйбуттара. Билигин собуот технологическай дьиэтэ барыта көтүрүллэн турар.

 

Елена ПОТОЦКАЯ, “Саха сирэ” хаһыат, edersaas.ru

Хаартыска — СИА.

 

 

 

1
0