“Ыраас Арктика”: Саха сиригэр экология федеральнай бырайыагы олоххо киллэрии салҕанар

Былырыын Тикси бөһүөлэгиттэн Саха сиригэр “Ыраас Арктика” диэн экология федеральнай бырайыагын олоххо киллэрии саҕаламмыта. Эрдэ Ил Дархан Айсен Николаев сорудаҕынан көҕүлэммит өрөспүүбүлүкэтээҕи бырайыак иитинэн, эрэгийиэҥҥэ Арктика зонатын кытылын ыраастыыр үлэни саҕалаабыттара.

“Ол иһин Саха сирэ федеральнай бырайыакка түргэнник кыттыста уонна ити үтүө түмүгэ көһүннэ”, — диэн Арктиканы сайыннарыы уонна хотугу норуоттар дьыалаларын министиэристибэтигэр эттилэр. “Ыраас Арктика” сүүнэ экологическай бырайыакка өрөспүүбүлүкэ кыттыытын федеральнай бырайыактыыр офис салайааччыта Андрей Нагибин үрдүктүк сыаналаата.

Ааспыт сыл түмүгүнэн Булуҥ улууһуттан волонтердар, олохтоох нэһилиэнньэ уонна Арассыыйа оборонаҕа министиэристибэтин күүһүнэн 300 туонна хаарбах тимири уонна 250 туонна мас этин, былаастыгы хомуйан таһаардылар.

Быйыл Арктика сирин-уотун ыраастыыр уонна Саха сирин Арктикатыгар олоххо киирэр экология бырайыактарыгар бырамыысыланнай хампаанньалары сыһыарар үлэ салҕанар.

«Арктик Втормет» ХЭУо РФ Оборонаҕа министиэристибэтин боломуочуйалаах операторын быһыытынан Тикси бөһүөлэгин уонна аттынааҕы сири-уоту хаарбах тимиртэн ыраастыыр үлэни салгыыр, хампаанньа саахалланар туруктаах тутуулары көтүрэрэ уонна таһаарар үлэни ылынар. 2023 сылга диэри Тикситтэн 40 тыһ. туонна бөҕү таһаарар былааннаахтар.

Бу сыл бүтүөр диэри Усуйаана оройуонуттан – Депутатскай, Усть Куйга уонна Севернай үс бөһүөлэктэн 20 тыһ. туонна бөҕү таһаарыахтара. Хаарбах тимири туһаҕа таһаарыы сөбүлэҥин Усуйаана улууһа уонна «ВСП-Ресурс» Арассыыйаҕа Арктика зонатын резиденэ баттаспыттар.

«Янолово» АУо уонна «Янзолото» ХЭУо корпоративнай волонтерства иитинэн икки нэһилиэнньэлээх пуунтан — Аллайыаха улууһугар Оленегорскай сэлиэнньэтин уонна Усуйаанаҕа Силээннээҕи ыраастыахтара. Атын даҕаны экологическай тэрээһиннэри олоххо киллэрэр былааннаахтар.

«АЛРОСА» уонна «Полиметалл» курдук бөдөҥ хампаанньалар өттүлэриттэн өрөспүүбүлүкэ арктика уонна хотугу улуустарыгар Абыйга, Аллайыахаҕа, Анаабырга, Булуҥҥа, Дьааҥыгы, Эдьигээҥҥэ, Муомаҕа уонна Эбээн Бытантайга кураатардааһыны тэрийии боппуруоһун үөрэтэллэр.

Санатан эттэххэ, Саха сиригэр барыллаан 437 сиргэ өҥнөөх уонна хара металлар хаарбахтарын мунньуллуулара бэлиэтэнэр, уопсай кээмэй 84 % өрөспүүбүлүкэ Арктикатааҕы зонатыгар.

СӨ Ил Дарханын уонна СӨ Бырабыыталыстыбатын пресс-сулууспата.

Хаартыска: СӨ Арктиканы сайыннарыыга уонна хотугу норуоттар дьыалаларыгар министиэристибэтиттэн.