Балаҕан ыйын 22 күнүгэр Тиксиигэ «Ыраас Арктика» волонтердара хомуйбут хаарбах тимирдэрин сүөкээһин саҕаланна.
Алын Бэстээхтээҕи таһаҕас терминалыгар «М-53» баарса Тиксииттэн 435 туонна хаарбах тимири аҕалла. Араартаан, бирикиэттээн баран контейнердарга уган, тимир суолунан Амурдааҕы Комсомольскайга хат уулларан туһанарга ыытыахпыт диэн Өлүөнэ өрүс холбоһуктаах пароходствотын бэрэстэбиитэллэрэ-уопсастыбаннай гражданскай көҕүлээһин партнёрдара этэллэр.
– Биһиги «Ыраас Арктика» бырайыакка кыттарбыт икки бүк үөрүүлээх, тоҕо диэтэххэ, Арктиканы кэлим ыраастааһын биир идэлээхтэрбит: «Кыайыы 50 сыла» ледокол хапытаана Дмитрий Лобусов уонна ледокол хапытаана Үлэ Дьоруойа Геннадий Антохин идиэйэлэрэ буолар, – диир Өлүөнэ өрүс холбоһуктаах пароходствотын генеральнай дириэктэрэ Сергей Ларионов.
– Өрөспүүбүлүкэ Бырабыыталыстыбата, Арктиканы сайыннарыы уонна хотугу омуктар дьыалаларын министиэристибэтэ, өрөспүүбүлүкэ Москваҕа бэрэстэбиитэлистибэтэ бырайыагы өйүүллэр, – диэтэ баарсаны көрсөрүгэр Арктиканы сайыннарыы уонна хотугу омуктар дьыалаларын миниистирин бастакы солбуйааччы Сергей Неустроев. — Кэлэр өттүгэр биһиги бу үлэни салгыахпыт, Арктика бары улуустарыгар ырааһырдыы үлэтин ыытыахпыт. «Ыраас Арктика» толору цикл бырайыага буолар, онон бу хомуллубут хаарбах тимир ханна тиэрдиллэрин кэтээн көрүөхпүт.
Санатан эттэххэ, бырайыак от ыйын бүтүүтүгэр Арассыыйа Федерациятын Уопсастыбаннай палататыгар саҕаламмыта. «Күөх патруль» Бүтүн Арассыыйатааҕы уопсастыбаннай түмсүү көҕүлээһининэн анал пуонда тэриллэн, хос бэрэссэдээтэлинэн айылҕа миниистирэ Александр Козлов анаммыта. Бырайыагы Росприроднадзор, «Ыччат УоНФ», Бүтүн Арассыыйатааҕы быһааччылар студенческай куорпустара, «Ыраас дойду» тобоҕу туһаҕа таһаарар оператордар ассоциациялара, «Нориль никелэ» ГМК, «Арассыыйа тимир суолара» ААУо, «Орион» хампаанньа уо.д.а. өйөөбүттэрэ. «Ыраас Арктика» волонтердара балтараа ый устатыгар 60 га сири ыраастаабыттара, 600 туонна хаарбах тимири, 150 кубометр пластигы уонна 3 тыһыынча тимир буочуканы хомуйбуттара.
Арктика сирин ырааһырдыы салҕанар. Субуотунньуктарга олохтоохтор көхтөөхтүк кытталлар. Маннык дьаһаллар Комига, Карелияҕа, Мурманскай уонна Архангельскай убаластарга эмиэ тэрилиннилэр, Саҥа сиргэ экспедиция үлэлиир. «Ыраас Арктика» официальнай сайтыгар чистая-арктика.рф бырайыакка волонтерынан киирэргэ сайаапкалары хомуйуу барар. Видеоны манна көрүөхххэ сөп: https://disk.yandex.ru/d/fCZ3TtlLvb9n3A диэн «Ыраас Арктика» уопсастыбаннай гражданскай көҕүлээһин пресс-киинэ иһитиннэрэр.
Раиса Сибирякова, «Саха сирэ», edersaas.ru