Ыраахтан үөрэнээччилэргэ үлэлиир миэстэлэрин тэрийии туһунан
Паартаҕа эбэтэр оробуочай остуолга өр хамсаабакка олоруу үөрэнээччи организмын элбэх систиэмэтин, ордук тымыр уонна тыынар уорганнар, үлэлэригэр дьайар.
edersaas.ru
Өр олордоххо оҕо тыынара кылгыыр, биэсэстибэлэр атастаһыылара намтыыр, атахтарын диэки хаан тохтооһуна барар. Ити барыта организм, чуолаан мэйии үлэлиир дьоҕура намтыырыгар, тириэрдэр: болҕомтото мөлтүүр, өйдүүр дьоҕура сыппыыр.
Үөрэнээччи оробуочай миэстэтин күн сырдыга тыгарын курдук түннүк таһыгар олохтуур ордук. Сырдык төһө да элбэх курдугун иһин, остуол лаампата син биир наада.
Остуолга көмпүүтэр баар буоллаҕына, монитор оҕо хараҕын иннигэр баар буолуохтаах (оҕо монитор диэки эргичиҥнээбэтин курдук). Видеомонитор экрана кини хараҕыттан 600-700 мм тэйиччи буолуохтаах.
Кинигэлэри төһө кыалларынан илиитин ууммутун саҕа ыраахха, анал тирэххэ ууруҥ. Бу оҕо төбөтүн көнөтүк тутарыгар көмөлөһөр (моонньо ноҕуруускаланарын аччатар) уонна ырааҕы көрбөт буоларын (близорукость) бопсор.
Оҕо үөрэх дьарыктарын кэмигэр сылайбатын курдук сөпкө олорорун хааччыйыҥ. Ол эбэтэр, оҕо олоппоско дириҥник киирэн олоруохтаах, куорпуһун уонна төбөтүн тэҥҥэ тутуохтаах, атахтара өттүгүн уонна тобугун сүһүөхтэригэр токуруйар буолуохтаах, тилэхтэрэ муостаҕа тирэниэхтээхтэр.
Оҕо суруйар буоллаҕына, устуул эркинигэр курданарынан тирэниэхтээх, ааҕарыгар арыый көҥүллүк туттан олоруохтаах.
Сылайбатын наадатыгар 30-45 мүнүүтэ буола-буола туран сэргэхсийиэхтээх, эрчиллиилэри уонна харах гимнастикатын оҥоруохтаах.
Надежда ЕГОРОВА, “Саха сирэ”, edersaas.ru