Уһук Хоту уонна ыраах сытар улуустарга хаһыаты, баһыылканы таһыыга почта үлэһиттэрэ өрүү харгыстары көрсөллөр. Онон почта кэмигэр тиэллибэккэ, нэдиэлэни-нэдиэлэнэн мунньуллар.
Сотору кэминэн снегоболотоходунан Кэбээйи улууһун кытыы сытар нэһилиэктэригэр почтаны таһыахтара. Бу туһунан Почта Саха сиринээҕи управлениетын дириэктэрэ Петр Птицын иһитиннэрдэ.
Ол курдук бу күннэргэ Сангаар бөһүөлэгэр снегоболотоходу тириэртилэр. «Сокол +» техника бэнсиининэн үлэлиир, чааска 50 км айанныыр кыахтаах.
«Сааскыттан саҕалаан тайҕаҕа айан-сырыы сытыырхайар. УАЗ массыынанан да, тыраахтарынан даҕаны киһи сатаан сылдьыбат буолар. Онон почтаны таһыыга вездеход улахан туһалаах буолуоҕа», – диэн Сангаар бөһүөлэгин почтатын начаалынньыга Афанасий Полятинскай этэр.
Арассыыйа Почтата Сангаартан 13 нэһилиэнньэлээх пууҥҥа, ол иһигэр Сииттэҕэ, Кэбээйигэ, Тыайаҕа, Сиэгэн Күөлгэ, Мастаахха, Баҕадьыга, Чагдаҕа, Арыктаахха, Сэбээн Күөлгэ, Лүксүгүҥҥэ, Сайылыкка, Арҕастаахха, Батамайга почтаны тириэрдэр.
Эбэн эттэххэ…
Сангаар бөһүөлэгин Почтатын начаалынньыга Афанасий Полятинскай 2019 сыллаахха суол-иис суох кэмигэр, 350 км сатыы хааман 97 киилэ ыйааһыннаах корреспонденцияны аадырыстарынан тарҕаппытын дьоруойдуу быһыыга тэҥнээбиттэрэ. Почта күнүгэр почтовиктар бастыҥ үлэлээх дьоннорун чиэстээн, Афанасий Полятинскайга «Сыл бастыҥ киһитэ» диэн бэлиэни туттарбыттара.