Ыраах кырыы нэһилиэк кыайыылара кынаттыыр

Ааптар: 
Бөлөххө киир:

Ньурба улууһун тэбэр түгэҕэр улуус кииниттэн 120 км ыраах олорор Хорула нэһилиэгэ 2021 сылы олоҕун бары эйгэтигэр ситиһиилээх түмүктээн, олохтоохтор бука бары үөрүүлэрэ үрдээтэ.

Ааһан эрэр сыл устатыгар улуус нэһилиэктэрин икки ардыларыгар ыытыллыбыт күрэхтэһиилэргэ икки бастакы миэстэни бөдөҥ нэһилиэктэр — Маалыкай, Антоновка ыллылар, оттон Хорула нэһилиэгэ үһүс бочуоттаах миэстэ буолан, 500 тыһыынча солкуобайынан наҕараадаланар чиэскэ тигистэ.

Бу улахан сыралаах үлэ, сатабыллаах тэрээһин түмүгэр кэлбит ситиһии! Нэһилиэккэ саҥа тутуулар — исписэлиистэр олорор сабыс-саҥа 4 кыбартыыралаах толору хааччыллыылаах дьиэлэрэ, ФАП дьиэтэ, СПК саҥа хотоно, олохтоохтор куораттан итэҕэһэ суох толору хааччыллыылаах дьиэлэри туттан киириилэрэ, ону сэргэ аҥардас бу сыл иһигэр Элбэх өҥөнү оҥорор киин, таас оскуола тутуллан үлэҕэ киирэннэр, дьоҥҥо-сэргэҕэ туһалыы тураллара, үгүс ыал киин итиитиигэ, сайыҥҥы уу ситимигэр холбонуулара, тэрилтэлэр тахсыылаах үлэлэр, онтон да атын кэккэ ситиһиилэр олохтоохтор сүргэлэрин көтөҕөр, инникигэ эрэллэрин күүһүрдэр. Бу барыта ыллыктаах толкуйдаах, ылыннарыылаах туруорсуулаах, хамсатыылаах тэрээһиннээх эдэр баһылык Василий Николаевич Семенов салалтатынан, иилээһининэн-саҕалааһынынан ситиһиллэ турарын нэһилиэнньэ өйдүүр, сыаналыыр буолан, быйыл иккистээн баһылыгынан таланнар, инники кэскиллэрин итэҕэйбиттэрэ оруннаах. Үлэлиир киһиэхэ “Уолбутун таламмыт, абыранныбыт!” — дииллэрин саҕа үрдүк сыанабыл баара биллибэт.

Е.К.Федоров аатынан Хорула орто оскуолатын дириэктэрэ Павел Николаевич Васильев үөрэхтээһин бары үлэтин, усулуобуйатын дьоһуннук тэрийиитинэн уонна алын кылаас оҕолорун үөрэтэр саҥа таас оскуола тутуллуутун иилээн-саҕалаан, кэмигэр үлэҕэ киллэрэри ситиһиитинэн «Сыл бастыҥ дириэктэрэ” ааты ылыан ылла.

Ол курдук, соторутааҕыта, ахсынньы 10 күнүгэр Хорула нэһилиэгин олохтоохторугар умнуллубат кэрэ бэлиэ күҥҥэ билиигэ көрүүгэ сирдиир, үтүөҕэ-кэрэҕэ угуйар, сырдыгынан сыдьаайар үөрэх кыһата — таас оскуола дьиэтэ үөрүүлээх быһыыга арыллыбыта. Нэһилиэк ыччаттарыгар үөрэҕи-билиини тэлэччи арыйыахтаах саҥа таас оскуола аанын аалай кыһыл лиэнтэтин Ил Түмэн Бэрэссэдээтэлин солбуйааччыта Антонина Григорьева, Ньурба улууһун баһылыга Алексей Иннокентьев, СР үөрэҕин уонна наукатын миниистирин солбуйааччыта Владимир Тихонов, үөрэхтээһин улуустааҕы салаатын начальнига Алевтина Аргунова, «Хорула нэһилиэгэ» муниципальнай тэриллии баһылыга Василий Семёнов, оскуола дириэктэрэ Павел Васильев уопсай үөрүү-көтүү ортотугар быһан, ситиһиилээх үлэҕэ-үөрэххэ алҕаабыттара. Оскуола кэлэктиибэ оҕолору үөрэтиини үрдүктүк баһылаабыт ааттаах-суоллаах учууталлардаах, кэккэ ситиһиилэрдээх. Ону аҥардас бу сылга оскуола биэс бастыҥ учуутала Россия уонна өрөспүүбүлүкэ наҕараадаларын ылыылара да туоһулуур. Нэһилиэк бары да тэрилтэлэрэ бу курдук сылларын этэҥҥэ ситиһиилээхтик түмүктээтилэр.

Хорула нэһилиэгин Чиллэ үрэҕэр күн сирин көрбүт өрөспүүбүлүкэ таһымыгар билиниллибит айылҕаттан айдарыылаах Ийэ олоҥхоһут, 8 олоҥхо ааптара, олортон хас да сурукка тиһиллибит олоҥхолоох Василий Иванович Иванов-Чиллэ Баһылай сыл түмүгүнэн Саха сирин бастыҥ олоҥхоһута ааты ылыан ылла диэн бар дьоно үөрэ-көтө иһиттилэр.
Ити курдук, ыраах олоробут диэн хаһан суҥхарбакка, хайа да үлэни аҥар кырыытыттан хоруйар, бүтэрэр-оһорор, олох дьолун онтон сомсо үөрүйэх тыа дьонун быйылгы сыл түмүктэриттэн үөрүүлэрэ үксээн, Саҥа дьылы эрэллээхтик көрсөллөр. Хайа да ыарахаттартан чаҕыйбакка, бииргэ сомоҕолоһон үлэлиири, бэйэ бэйэҕэ көмөлөһүүнү өрө тутар олохтоохтору нэһилиэктэрин, оскуолаларын, биирдиилээн тэрилтэлэрин, олохтоохторун маннык кыайыылара инникигэ кынаттыыр, саҥаттан саҥа үрдэллэргэ сирдиир.

Елена Иванова.

+1
0
+1
0
+1
0
+1
0
+1
0
+1
0
+1
0