Кыһыҥҥы тымныы күннэргэ Таатта улууһун ыраах айаҥҥа суоппардара үлэлии бараары тэринэ сылдьаллар.
edersaas.ru
Сотору кэминэн суоппардар ыраах хоту улуустарга норуот хаһаайыстыбатыгар аналлаах таһаҕаһы тиэйэ барыахтара. Оттон кинилэр кэргэттэрэ бу кэмҥэ дьиэ түбүгүттэн ордон, араас туһалаах дьыаланан дьарыктаналлар.
— Биһиги Таатта дальнобойщиктарын кэргэттэрэ мустан «Дьүөгэ» кулууп тэриммиппит. Түмсүүбүтүгэр кыһыҥҥы киэһэлэргэ бибилэтиэкэҕэ мустан, иистэнэбит, санаа атастаһабыт, иллэҥ кэммитин туһалаахтык атаарабыт.
Былырыыҥҥыттан ыла мустар буолбуппут. Быйыл кэккэбит хаҥаан иһэр. Ол курдук, билигин биһиги кэккэбитигэр суох, өр кэмҥэ суоппардаабыт Петр Осипов кэргэнэ Ульяна уонна Владислав Сабарайкин кэргэнэ Римма кэлэн, биһигини кытта бииргэ иискэ дьарыктанан, бэркэ сэргэхсйэн бардылар. Былырыын араас киэргэллэри оҥоро үөрэммпиппит.
Быйыл иис арааһыгар үөрэнэн эрэбит. Маастар-кылааһы ыраах айан суоппара Леонид Быгынанов кэргэнэ Александра ыытар. Ити курдук, мантан инньэ кэргэттэрбит ыраах айаҥҥа туруннахтарына, «Дьүөгэ» кулууппутуттан өссө арахсыахпыт суоҕа. Дьоммутун бары бииргэ долгуйа кэтэһиэхпит, — диэн санаатын үллэстэр Тааттатааҕы дальнобойщиктарын кэргэттэрин «Дьүөгэ» кулууптарын чилиэнэ Людмила Кутугутова.
Биир түмсүүлээх дьоҥҥо олоххо биир интэриэстэн ордук суох буоллаҕа.
Елена ПОТОЦКАЯ, «Саха сирэ» хаһыат, edersaas.ru
Хаартыска — Людмила Кутугутова архыыбыттан.