Быйыл хоту улуустарга киин улуустар дальнобойщиктара от уонна эбии аһылыгы тиэрдэн, кыстыгы этэҥҥэ туоруурга тугунан да кэмнэммэт улахан өйөбүлү оҥордулар.
Елена ПОТОЦКАЯ, «Саха сирэ» хаһыат, https://edersaas.ru
Тымныы полюһугар, Өймөкөөҥҥө кыһыҥҥы туризм бэстибээлгэ баран иһэн, Томпо улууһун Теплай Ключ бөһүөлэгин чайнойугар толору от тиэммит үгүс массыынаны көрдүбүт. Кинилэртэн биир ыраах айан суоппарын кытта көрсөн кэпсэттим.
Мэҥэ Хаҥаластан сылдьар “Бүөтүр Үстүүнэппин” диэн бэйэтин билиһиннэрбит суоппар Абыйга от тиэйэ баран иһэр этэ.
— Бу Амматтан тиэйэн эрэбит. Ханна от баар да, онно ыытан тиэйтэрэллэр. Олунньу саҥатыттан үһүс сырыым. Иккитэ Муомаҕа тиэйбитим. Хоту улуустар өрүстэригэр тарыҥ тахсан эрэйдиир. Уоннааҕыта этэҥҥэ айанныы сылдьабыт. Бу кэнниттэн өссө биирдэ барыахтаахпыт да, күн-дьыл туруга тохтоторо дуу, арыый уһатара дуу, — диэн санаатын үллэстэр уопуттаах суоппар Бүөтүр Үстүүнэп.
Биир КамАЗ-ка 40 рулон, ол эбэтэр 12 туонна от киирэр. Тиэллэн кэлбит оту суоппардар ыаллары кэрийэ сылдьан, кыбыыга түһэрэн биэрэллэр эбит. Биллэн турар, онно хаарыаннаах бириэмэлэрин сүүйтэрэллэрэ чахчы. Аны “Халыма” федеральнай трасса быйыл олус халтараан буолан, айан-сырыы өссө кутталламмыкка дылы буолбут. Аара хас да улахан уйуктаах массыына трассаттан туораан, тутуу матырыйааллара суолга ыһылла сыталларын көрбүппүт. Дьолго, отторо ыһыллан сытар массыыналар көстүбэтэхтэрэ. Быйылгы ыарахан кыстыгы этэҥҥэ аһарарга өйөбүл буолбут адаар таас хайалары уҥуордаан айанныыр ыраах айан суоппардарыгар хоту дойду дьоно махталлара муҥура суох.
Елена ПОТОЦКАЯ, «Саха сирэ» хаһыат, https://edersaas.ru
Ааптар хаартыскаҕа түһэриилэрэ.