«Бытархай» уоруу киһи үөйбэтэх сиригэр уонна көһүппэтэх өттүттэн тахсыан сөп — ону олох көрдөрөр. Итинник уоруулары эмиэ сэрэтэн суруйааччыбыт, бэйэ болҕомтолоох, сэрэхтээх буолуҥ диэн.
Мииринэй биир оскуолатыгар уоруу тахсыбыт — учуутал кумааһынньыгыттан 10.000 солкуобай харчыны уорбуттар. Сүтүктээх дьахтар тута полицияҕа эрийбит.
Суһал-ирдиир тэрээһиннэр кэмигэр полиция оперативниктара уорбаланааччы кимин быһаарбыттар, туппуттар — бу оскуола 15 саастаах үөрэнээччитэ эбит.
Сабаҕалааһын быһыытынан, бу уол учууталын кабинетыгар олорон, дьахтар суумкатыгар кумааһынньыга баарын өйдөөн көрбүт. Уонна учуутала быстах кэмҥэ тахсан бараатын, тута сойботоот, куотар аакка барбыт.
Ол уорбут харчытынан бэйэтигэр тирии портмоне, бейсболка уонна бородуукта ылыммыт.
Бу чахчынан «Уоруу» ыстатыйанан холуобунай дьыала тэриллибитин туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.