2000-с сыллар саҥалара Дьокуускайга брейкердэр түмсүүлэрин саҕалаан, 2005 сыллаахха Yo´kutzk диэн хамаанда үөскээбитэ. Бүгүн, атырдьах ыйын 7 күнүгэр, хамаанда 20 сыллаах үлэтин бэлиэтээтэ.
Төһө да күһүҥҥүлүү тымныы күн турдар, 2000-с сыллардааҕы оччолорго брейк үҥкүүнү, ити эйгэни сэҥээрэр дьон, оннооҕор оҕолорун илдьэ кэлбиттэрэ сөхтөрдө.
Тэрээһин иннинэ хамаанда салайааччытын Иван Степановы кытта кэпсэттим:
— Мин билигин да брейк үҥкүүлүүбүн. Бүтэһик үс сылга күүскэ дьарыктанабын. Хамаандабыт Yo´kutzk диэн ааттаныыта «Yo» диэнтэн саҕаланар. Бу киһиэхэ туһаайыы буолар. Биһиги хамаандабыт аата Дьокуускай куораты кытта ыкса ситимнээх. Тоҕо маннык сурулларый диэтэххэ, Максим Аммосов диэн брейкер граффити уруһуйдууругар Якутск диэн тылы улахан бэстибээлгэ “Спарта” успуорт комплекс таһыгар маннык суруйбутуттан саҕаламмыта. Оччолорго “Спарта” таһыгар ыччат, оҕолор хото мустар кэмнэрэ этэ. 2000-с сыллар ортолоруттан биһиги Дьокуускай куорат бары ыытыллар кэнсиэртэригэр, тэрээһиннэригэр кыттар буолбуппут. Бүгүн брейк-данс, хип-хоп эйгэтин сэҥээрээччилэр муһуннулар. Үгүспүт дьиэ кэргэннээх, сорохтор 40 саастарын да аастылар. Ол эрээри, бүгүн доҕотторбутун түмэн, урукку кэми санаан хип-хоп эйгэтин, култууратын сөргүттүбүт. Тэрээһиммитигэр кэлбит бары доҕотторбутугар махтанабын.
+1
8
+1
+1
+1
+1
+1
+1
1