“Өлүөхүмэ кыладабыайа” хааччахтаммыт эппиэтинэстээх тэрилтэ бэйэтин көрдөрүүлэринэн өрөспүүбүлүкэҕэ биир бастыҥ хаһаайыстыба буолар.
Манна сопхуос саҕаттан үлэлиир кылаабынай зоотехник Светлана Филимоновна Слепцова уонна эдэр техник-осеменатор Роман Мамонтов кыһамньыларынан, ынах барыта искусственнай сиэмэлээһининэн хабыллар.
Хаһаайыстыба Үҥкүрдээҕи пиэрмэтигэр ыанньыксыттар Л.Ф.Нутчина, О.С.Корнилова, Л.Н.Копылова, Л.В. Давыдова, В.Н.Архангельская, үүтү тутааччы О.Г.Лыткина, ынахтары аһатааччы С.М.Габышев, Ю.Н. Былков уонна Г.В.Васильев үтүө суобастаахтык үлэлииллэр. Былааннарын мэлдьи толороллор. Билигин пиэрмэ ынаҕын 60 %-а хайы-сах төрөөн турар.
— Мин 43 ынахпыттан 23 ынаҕым төрөөтө, — диир ыанньыксыт Людмила Нутчина. – Ас-үөл баар, төрөөбүт ынахтарга күҥҥэ 10 киилэ оту, 15 киилэ сиилэһи, биэс киилэ сенаһы уонна үс киилэ комбикуорманы сиэтэбит, онон үүтү сайыҥҥылыы ыыбыт. Ынах эрдэ төрүүрэ үчүгэй, бастатан туран, ыанар кэмэ уһатыллар, биһиэхэ хамнаспыт төһө үүтү ыырбытынан ааҕыллар. Ону таһынан, кыһын баччаларга төрөөбүт ньирэй мэччирэҥҥэ ситэн-хотон баран тахсар, күһүн биллэрдик улаатан-төлөһүйэн, кыстыкка киирэр.
— Бу ньирэй аата Орбита диэн, олунньу 19 күнүгэр төрөөбүтэ, — диир ыанньыксыт Ольга Корнилова. — Маассабай төрүөх сүнньүнэн түмүктэнэн эрэр. Саҥа төрөөбүт ньирэйдэри уон хонукка бэйэбит көрөбүт, ыаммытынан үүтү иһэрдэбит, онтон ньирэйи көрөөччү А.В.Давыдоваҕа уонна Г.Н.Габышеваҕа туттарабыт. Кинилэр хас биирдии ньирэйи оҕо курдук бүөбэйдээн, кыһамньылаахтык көрөллөр-истэллэр.
Өлүөхүмэттэн Валерий Малышев, «Саха сирэ» хаһыакка,
edersaas.ru сайтка анаан