Олунньу 7 күнүгэр СӨ бырабыыталыстыбата Алдан оройуонугар отчуоттаата. Мунньах онлайн көрүҥүнэн ыытылынна. Кэмпириэнсийэни бырабыыталыстыба бэрэссэдээтэлин бастакы солбуйааччы Кирилл Бычков салайан ыытта.
Ыллымах бөһүөлэгэ
Томмот бөһүөлэгэр хаарбах дьиэттэн көһөрүү бырагырааматыгар киирбит эрээри, олус тымныы дьиэлэргэ өрөмүөн оҥоһулларын, ууга барар сирдэр испииһэктэригэр киирбэтэҕин, о.д.а. боппуруостары туруорустулар.
“Ассоциация строителей АЯМ” хочуолунайыттан оттуллар “База” микрооройуоҥҥа дьиэлэр олус тымныылар. Олохтоохтор хочуолу уларытарга, эбэтэр өрөмүөн оҥорорго көрдөһөллөр.
Ыллымах бөһүөлэгэр тиийэр суолга ааспыт үйэ 70-с сылларыгар тутуллубут муоста эргэрбитин эттилэр. Бу муниципальнай суол муостата буолар. Тырааныспар миниистирэ Владимир Сивцев былырыын 11, иллэрээ сыл 12 муоста тутуллубутун иһитиннэрдэ. Бу бырагырааманан муниципальнай суолларга эмиэ туталлар. Бырайыактыыр-сметалыыр докумуону оҥорторон, министиэристибэҕэ сайаапка биэрэргэ эттэ. Чахчы саахалланар туруктаах буоллаҕына, муоста тутуллуохтаах диэн бэлиэтээтэ.
Алдан оройуонун баһылыгын э.т. Рустам Халиуллин эппитинэн, муоста бырайыактыыр-сметалыыр докумуона оҥоһуллан турар, онон сайаапка бэриллэн, муоста тутуллар чинчилэннэ.
Аллараа Кураанах баһылыга Александр Усенко быйыл бөһүөлэк тэриллибитэ 75 сылын үбүлүөйдээри бэлэмнэнэрин туһунан кэпсээтэ. Кураанах олохтоохторо улуус да, өрөспүүбүлүкэ да сайдыытыгар улахан кылааттарын киллэрбиттэрэ. Нэһилиэнньэни иһэр уунан хааччыйыы, “суһал көмө” массыынатын биэрии, уулуссаны өрөмүөннээһин, о.д.а. боппуруостары туруорустулар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru