Өлүөнэ Эбэ мууһуттан босхолонор кутталлаах кэмнэрин бастакынан биһиги, Хаҥалас улууһун Тойон Арыы учаастагын олохтоохторо, аһарабыт.
edersaas.ru
Ол курдук, ыам ыйын 11 күнүнээҕи түүн Сиинэҕэ баар харыы төлө баран, биһиэхэ Тойон Арыы олохтоохторугар, кутталы үөскэтэ сырытта.
Учаастак олохтоохторо эрдэттэн маннык түбэлтэҕэ үөрэхтээх дьон быһыытынан, түүн диэн уолуйбакка, кыралыын-улаханныын быыһанар аатыгар бардыбыт. Бу маннык түбэлтэ биһигини өрүү сомоҕолуур, биир тыынныыр. Дьиэҕэ олорор эрэсиими тутуһан олорор буолан, быйыл кыра оҕо элбэх. Онон 36 оҕону сиэппитинэн, үгүс киһи эвакопууҥҥа тиийдэ. Олохтоох дьаһалтабыт баһылыга Денис Уваров барыбытын кытта тэҥҥэ сырытта. Маннык түбэлтэҕэ өрүү сүбэ-ама буолар, дьону түмэр сир түннүгэ дьонноохпут. Ол курдук, түөлбэ салайааччыта Светлана Алексеева, нэһилиэк дьокутаата Дария Хоютанова чаас аайы дьиэнэн биллэрэн, уу таһымын хонтуруоллуу олордулар. Эдэр урбааннььыт Антонина Корнилова халаан ыксаллаах кэмигэр барыбытын минньигэс килиэбинэн хааччыйа олордо.
Биһиги ынах сүөһүбүтүн кэмигэр ыраах үрдүк сиргэ күрэппит эбит буоллахпытына, сыспай сиэллээхпитин үспүөйдээн, киһи эрэнэ саныыр гына түптээн дьаһайбатахпыт. Аны атыырбыт үөрүттэн илиибитин сотуннубут диэн кутталга киирдибит. Ол санаатыгар ылларан сырыттыбыт. Арай саамай ыксаан олордохпутуна, Покровскайтан Иван Монастырев, айылҕаттан айдарыылаах Тирэх Уйбаан эрийдэ. Кини: «Хайа, хайдаххытый, туох сонуннааххытый?» — диэн ыйыппытыгар, мин, ыксаан сылдьар киһи, сылгыларбытын сүтэрбиппин кэпсээн айманным, ол быыһыгар долгуйан ытамньыйдым эҥин. Ол үөргэ атын дьон кыттыгас биэлэрэ, кулуннара баара. Туһугар, икки бүк эппиэтинэс буоллаҕа. Онуоха Тирэх Уйбаан бэрт холкутук: «Санаарҕаама, айылҕа оҕолоро буоллахтара, бааллар. Сотору тиийэн кэлиэхтэрэ«, — диэтэ. Оо, онно «ыксаллаах кэмҥэ наадалаах тылынан өйөбүл күндүтүөн!» дии санаатым.
Иллэрээ күн табаарыспыт Иван Анастатов эрийдэ: «Сылгыгыт үөрэ бу тиийэн кэллэ«. Эбиэттии олорон, мэктиэтигэр бары ойон туран, үөрүү-көтүү бөҕө буоллубут. «Ураа!» хаһыытааччы да баар. Тута Тирэх Уйбааҥҥа эрийэн, муҥура суох махтал тылларын анаатыбыт.
Түгэнинэн туһанан, Иван Монастыревы-Тирэх Уйбааны бигэ туруктаах Дьиэ кэргэн күнүнэн итиитик-истиҥник эҕэрдэлиибин! Өрүү бүгүҥҥү курдук сахаҥ дьонугар, биир дойдулаахтаргар өйөбүл күүс-көмө буола сырыт дуу. Эн тута сылдьар Саха балаҕаныҥ хайаан да үлэҕэ киириэҕэ диэн эрэнэбит!
«Саха сирэ» хаһыакка, edersaas.ru анаан
норуот маастара Вера ВАРФОЛОМЕЕВА,
Хаҥалас улууһа, Тойон арыы.
Хаартыска – Вера Варфоломеева тиксэриитэ