“Ыйыт – хоруйдуубут” балаһаны бэлэмнээччилэр сүбэлээҥ эрэ. Түөрт хостоох кыбартыырабын оҕом дьиэ кэргэнин 2 хостоох кыбартыыратын кытта атастаһыахпын баҕарабын. Сөп буоллаҕына, ханна, ханнык докумуоннар ирдэнэллэрин, хантан хомуйан илдьэрбин сүбэлээҥ эрэ.
А.Розанова, Дьокуускай
Өрөспүүбүлүкэҕэ Хамсаабат баайы-дуолу эргитиигэ үлэлиир Арассыыйатааҕы «Российская Гильдия Риэлторов» идэтийбит холбоһук чилиэнэ буолбут соҕотох агентство — “СУЛУС” хамсаабат баай-дуол киинэ” хампаанньа салайааччыта Дмитрий Габышев маннык хоруйдаата:
— Кыбартыыраны атастаhыаххытын сөп. Сокуонунан бобуллубат. Атастаһыы дуогабара диэни (Договор мены) оҥороҕут. Онно атастаһар кыбартыыраларгыт уопсай характеристикалара ыйыллыахтаах. Төһө иэннээҕэ, хас хостооҕо, кадастровай нүөмэрэ, хаһан тутуллубута, хаhан кыбартыыра хаhаайына буолбуттара, төһөҕө сыаналанарын, кимнээх атастаhалларын дуогабарга киллэриллэрэ ирдэнэр. Дуогабар форматын интэриниэт ситимиттэн хачайдаан ылыаххытын сөп. Быһата, кыбартыыраларын атастаһар икки киһи көрсөн, көҥүл форманан дуогабары толороҕут. Ыарырҕатар буоллаххытына, ханнык баҕарар хамсаабат баайы-дуолу эргитии агентствотыгар тиийэн эбэтэр юридическай өҥөлөрү оҥорор хампаанньаҕа оҥотторуоххутун сөп. Дуогабаргытын оҥорон баран Элбэх өҥөнү оҥорор кииҥҥэ (МФЦ) тиийэн туттарыахтааххыт. Билиҥҥи кэмҥэ Covid-19 дьаҥа тарҕана турарынан сибээстээн, бастаан Элбэх өҥөнү оҥорор кииҥҥэ эрийэҥҥит эбэтэр бэйэҕит тиийэн үлэhит/администратор нөҥүө суруттарыаххытын сөп. Суруйтарбыт күҥҥүтүгэр, этиллибит кэмҥэ МФЦ-га бэйэҕит баар буоларгыт ирдэнэр. Ол курдук, бэйэҕит пааспаргытын, СНИЛС-таргытын, дьиэ-кэргэн буоллаххытына туоhулуур сибидиэтэлистибэҕитин, дьиэлэргит кадастровай, тиэхиньиичэскэй пааспардарын уонна дьиэ хаhаайыттара буоларгытын туоhулуур докумуону исписэлиискэ илдьэҕит. Биһиэхэ кэлэн сиһилии сүбэлэтиҥ, аадырыспыт: Лермонтов уулусса 47 дьиэтэ, 4 этээс, 20 кэбиниэт.
Биhиги көмөбүтүнэн Саха Сирин олохтоохторо бүтүн Арассыыйа үрдүнэн сөбүлээбит куораттарыгар кыбартыыра, чааhынай дьиэ уонна кэмиэрчэскэй дьиэ-уот ылыахтарын сөп.
Бэлэмнээтэ Женни СТРЮКОВА
Хаартыска: интэриниэттэн