2019 сылтан биэнсийэ систиэмэтигэр элбэх уларыйыылар киириэхтээхтэр. Киһи мунаарара үгүс. Онон ааҕааччыларбытыттан ыйытыылары хомуйдубут.
Ыйытыыларга РФ Биэнсийэ пуондатын Саха сиринээҕи салаатын үлэһиттэрэ: биэнсийэни аныыры, хаттаан ааҕары, төлүүрү тэрийэр отдел начаалынньыга Анастасия Кычкина уонна социальнай төлөбүр отделын начаалынньыгын солбуйааччы Максим Саввин эппиэттииллэр.
Ыйытыы: Биэнсийэҕэ саҥа таҕыстым, кыра мунньунуулаахпын. Айаным ороскуота төлөнүө дуо?
Эппиэт: Уһук Хоту олорор, кырдьар сааһынан уонна инбэлиитинэн страховой биэнсийэни ылар, үлэлээбэт дьон Арассыыйа иһинэн сынньана барар айан ороскуотун төлөттөрөр бырааптаахтар. Уһук Хоту оройуонугар Саха сирэ бүтүннүүтэ киирэр, ол иһин биэнсийэҕэ 5 сыл эрдэ тахсабыт.
Омук дойдутугар барыы төлөммөт. Биэнсийэлээх икки сылга биирдэ олорор сиригэр Биэнсийэ пуондатын салаатыгар, эбэтэр Элбэх өҥөнү оҥорор киин эбэтэр электроннай өҥө көмөтүнэн, ханна барарын ыйан туран, сайабылыанньа суруйуохтаах. Онно ханнык санаторийга, профилакторийга, сынньалаҥ базатыгар барарын докумуонунан бигэргэтиэхтээх (путевка, о.д.а.).
Көмө икки көрүҥнээх: Биэнсийэ пуондатыгар докумуоннаах кэлэн сынньана бараргын бигэргэттэххинэ, айан толуона бэриллэр. Эбэтэр биэнсийэлээх сынньанан кэлбитин кэннэ компенсация төлөнөр.
Ангелина Васильева, «Саха сирэ» хаһыат, edersaas.ru