Вирус саҥа көрүҥэ дьон доруобуйатыгар эрэ буолбакка, олоххо-дьаһахха эмиэ охсуулаах буолар чинчилэннэ. Эрэдээксийэҕэ маннык ис хоһоонноох ыйытыы киирдэ:
edersaas.ru
— Дьоҕус тэрилтэлээхпин. Бу үөскээбит эпидемиологическай туругунан судаарыстыба дьоҕус уонна орто урбаан тэрилтэлэригэр көмөнү оҥоруо диэн суруйаллар. Мин тэрилтэм дьоҕус биисинэскэ киирсэрин хантан билиэхпин сөбүй?
Ааҕааччыбыт ыйытыытыгар Арассыыйа ФНС СӨ оройуоннар икки ардыларынааҕы 5 №-дээх иниспиэксийэтин нолуогу төлөөччүлэри кытта үлэҕэ отделын нолуокка кылаабынай иниспиэктэрэ Елена Слепцова маннык хоруйу ыытта:
— Дьоҕус уонна орто урбаан субъектарын биир кэлим реестрэ нолуок сулууспатын саайтыгар https://ofd.nalog.ru/ баар. Бу реестргэ чопчу ирдэбиллэргэ сөп түбэһэр дьоҕус урбаан субъектара киирсэллэр.
Бу киритиэрийдэр “Арассыыйа Федерациятыгар дьоҕус уонна орто урбааны сайыннарар туһунан” 2004 сыл от ыйын 24 күнүнээҕи 209 №-дээх Федеральнай сокуоҥҥа сурулла сылдьаллар.
Реестргэ киирэр туһугар кэмигэр отчуоттуохха уонна нолуок иниспиэксийэтигэр тэрилтэ үлэһиттэрин орто ахсаанын, ону тэҥэ дохуоккут кээмэйин туһунан сибидиэнньэни биэриэхтээххит. Тоҕо диэтэххэ, ортотунан төһө үлэһиттээхтэрэ уонна сыллааҕы дохуоттара хампаанньалары уонна ИП-лары дьоҕус уонна орто урбаан тэрилтэтигэр киллэрэр кыаҕы биэрэр.
Тэрилтэ үлэһиттэрин ахсаанын туһунан нолуок уорганыгар бу сыл тохсунньу 20 күнүн аһарбакка, оттон тэрилтэ тэриллибит (хаттаан тэриллибит) ыйын кэннинээҕи ый 20 чыыһылатын аһарбакка сибидиэнньэни (РФ Нолуокка кодексын 80 ыст. 3 п.) биэриэхтээххит.
Арассыыйа ФНС СӨ оройуоннар икки ардыларынааҕы 5 №-дээх иниспиэксийэтэ сибидиэнньэлэрин биэрэ илик хампаанньалары уонна ИП-лары биэрэргитигэр сүбэлиир. Бу Дьоҕус уонна орто урбаан субъектарын реестриттэн таһаарыллыбат кыаҕы биэриэҕэ уонна судаарыстыбаттан бары өйөбүллэри толору кээмэйинэн ылалларыгар көмөлөһүө.
Бэлэмнээтэ Женни СТРЮКОВА, edersaas.ru