Коронавируһу утары охсуһууга үлэлиир медиктэр туһааннаах дьаҥҥа сутуллар биитэр инбэлииккэ тахсар түгэннэригэр, страховой төлөбүрү оҥоһулларын туһунан ыйаахха дойду Аҕа баһылыга Владимир Путин илии баттаабыта.
Ыйытыы: Саҥа ыйааҕынан страховка үлэһиккэ ханнык түгэҥҥэ төлөнөр?
— Арассыыйа бэрэсидьиэнэ Владимир Путин коронавирус сыстыганнаах дьаҥынан сибээстээн, бу дьыл ыам ыйын 6 күнүгэр мэдиссиинэ үлэhиттэрин сорох категорияларыгар көрүллэр эбии страховой мэктиэлэр туһунан ыйаахха илии баттаабыта. Бу докумуоҥҥа олоҕуран коронавируһунан ыалдьар, биитэр бу инфекцияҕа сыстыбыт буолуон сөптөөх ыарыһахтары кытары үлэлиир быраастарга, орто уонна алын мэдиссиинискэй персоналга, суһал мэдиссиинискэй биригээдэ суоппардарыгар биир кэмнээх төлөбүр оҥоһуллар.
Бу биир кэмнээх төлөбүр мэдиссиинискэй үлэһит коронавирус дьаҥыттан сылтаан суорума суолланнаҕына, эбэтэр бу сыстыганнаах ыарыы түмүгэр «больничнайга» бардаҕына, биитэр коронавирустан сылтаан медүлэһит кыайан үлэлээбэт буоллаҕына төлөнөр.
Коронавируһунан ыалдьыы түмүгэр доруобуйа харыстабылын үлэһитэ инбэлииккэ тахсар түгэнигэр:
I группалаах — 2 064 339 солк.;
II группалаах — 1 376 226 солк.;
III группалаах — 688 113 солкуобай кээмэйдээх страховой төлөбүр оҥоһуллар.
Ыйытыы: Мэдиссиинэ үлэһиттэрэ үлэлии сылдьан эчэйиини ылыылара урукку өттүгэр төһө чаастатык тахсар этэй?
Эппиэт: Урукку да өттүгэр мэдиссиинэ үлэһиттэрэ үлэлии сылдьан сыстыганнаах ыарыыга сутуллар түгэннэрэ тахсааччы. Онон ити коронавируска сыһыаннаах тахсыбыт саҥа дьаһал биһиги үлэбитигэр сана көстүү буолбатах. Күн бүгүн Социальнай страховкалааһын эрэгийиэннээҕи фондатын мэдиссиинэ 14 үлэһитигэр хас ый ахсын страховой төлөбүр оҥорор.
Ыйаах туһунан манна ааҕыҥ http://publication.pravo.gov.ru/Document/View/0001202005060026?index=0&rangeSize=1
edersaas.ru