Хаһаайыстыбаларга ыһыы үлэтин үгэнэ
edersaas.ru
«Туймаада» ҮАПХ иһинэн үлэлиир хаһаайыстыбалар ыһыыны барыта 1 тыһ. 944 гектар бааһынаҕа, ол иһигэр бурдугу 496 гектарга, сүөһү сиир култууратын 1 тыһ. 403 гектарга ыһар былааннаах үлэлии-хамсыы сылдьаллар. Бу хаһаайыстыбалар үүккэ идэтийэр буоланнар, үүнүүнү бааһынаттан ыларга дьулуһаллара, онуоха агротехнология ирдэбиллэрин толору тутуһан үлэлииллэрэ итиэннэ вика, Судан отун, горох, подсолнечник, кукурузаны курдук үүттүгэннээх үүнээйилэри ыһан, сиилэс уонна сенаж оҥороллоро өрөспүүбүлүкэ атын хаһаайыстыбаларыгар холобур буолар.
Саха сирин Украинатынан ааттаммыт Өлүөхүмэ улууһугар баар “Өлүөхүмэ кыладабыайа” ХЭУо бурдугу 156 гектарга, сүөһү аһылыгын 517 гектарга ыһар соруктаах. Ити иһигэр сиилэскэ уонна сенажка анаан эбиэһи, виканы, Судан отун, подсолнечнигы, кукурузаны ыһар.
Хаҥалас улууһугар икки хаһаайыстыба баар: “Нөмүгү агрофирма” уонна “Бөртө сылгы собуота” ХЭУо-лар. “Нөмүгү агрофирма” бурдугу 340 гектарга, сүөһү сиир култууратын (сиилэскэ анаан эбиэһи, Судан отун, овес, подсолнечнигы, кукурузаны) 336 гектарга ыһар итиэннэ хортуоппуйу 40 гектарга, оҕуруот аһын 5 гектарга олордор. Хортуоппуй олордуутун бу күннэргэ бүтэрэр, бурдук ыһыытын бэс ыйын 5 күнүгэр, сүөһү сиир култууратын бэс ыйын 20 күнүгэр түмүктүүр былааннаах.
“Бөртө” сылгы собуота” сүөһү сиир култууратын 550 гектарга ыһыахтаах. Күн бүгүҥҥү туругунан, мэхэньисээтэрдэр эбиэстээх гороҕу 260 гектарга ыһан, ыһыыны бэс ыйын 15 күнүгэр диэри бүтэрэрдии үлэлии сылдьаллар. Өлүөнэ Эбэ көмүөлүн көтөҕөрүгэр халаанынан дьалкыйбакка этэҥҥэ ааспыта, Ньукуолун күнүгэр балачча үчүгэйдик ардаабыта, билигин сайыҥҥылыы куйааран эрэр. Улаханнык саҥарыллыбат эрээри, ити барыта куһаҕана суох үүнүү төрүөтэ буолуо диэн эрэнэбит.
Раиса Сибирякова, «Саха сирэ» хаһыат, edersaas.ru