Роспотребнадзор кэккэ ыйыыларын сэргэ, сүрүн ирдэбилинэн кылааска биир оҕоҕо 2,5 кв.м. тиксиэхтээх. Хамсык бэлиэтэммэтэх нэһилиэктэригэр оҕолору туох баар ирдэбили тутуһуннаран үгэс быһыытынан оскуолаҕа үөрэтиэхтэрэ. Онтон хааччахтааһын баар, элбэх оҕолоох, ити ыйыллар 2,5 кв.м. тахсыбат оскуолаларыгар кылаас оҕотун хос бөлөхтөргө (подгруппы) араартаан үөрэтэр былааннаахтар. Бу туһунан СӨ Үөрэҕин уонна наукатын миниистирэ Михаил Сивцев иһитиннэрдэ.
Маныаха очнай-дистанционнай ньыманы тутуһуохтара. Оҕолор оскуолаҕа солбуйса сылдьан баран үөрэниэхтэрэ. Оччотугар оҕо биир сиргэ түмсүүтэ аҕыйыа диэн суоттууллар. Итиэннэ оҕолор кылаастан-кылааска көһө сылдьыбакка, биир сыһыарыллыбыт кылааска үөрэниэхтэрэ.
Элбэх үөрэнээччилээх оскуолаларга оҕолор биир бириэмэҕэ халҕаһалыы анньан кэлбэттэрин туһугар, үөрэх саҕаланыытын бириэмэтин кылаастарынан көрөн сорохторго арыый чаас аҥаара курдук хойутатан биэриэхтэрин сөбүн уонна кэтэх ааннары туһанарга сүбэлииллэр. Оттон харантыын биллэриллэр түгэнигэр үөрэх олоччу дистанционнай ньымаҕа көһүөҕэ диэн быһаарда. Онон ханнык көрүҥү тутуһан үөрэтэрин, оҕотун ахсааныттан көрөн оскуола бэйэтэ быһаарар. Оҕом доруобуйата мөлтөх диэн ыарыыттан сэрэхэдийэр эбэтэр быраас сүбэтэ баар түгэнигэр төрөппүт сайабылыанньа суруйан, оҕотун дистанционнай үөрэххэ көһөрүөн сөп.
Людмила ПОПОВА, «Саха сирэ» хаһыат, edersaas.ru