Үөрэх хаамыытын туһунан министиэристибэ суһал иһитиннэриитэ

Ааптар: 
Бөлөххө киир:

СӨ Үөрэҕин уонна наукатын министиэристибэтэ  өрөспүүбүлүкэҕэ үөрэх хаамыытын туһунан иһитиннэрэр.

edersaas.ru

Сэтинньи 3 күнүнээҕи туругунан, Бүлүү куорат “Туллукчаан” уһуйаана үлэтин сөргүттэ.

ОРВИ уонна кириип ыарыы тарҕатар нуорматын аһарыы үрдээбитинэн сибээстээн, Амма улууһун Покровка сэлиэнньэтин “Солнышко” итиэннэ Өлүөхүмэ улууһун 2 Нөөрүктээйи сэлиэнньэтин 16-с нүөмэрдээх “Сардаана” уһуйааннара харантыыҥҥа бардылар.

Инньэ гынан, 5 оскуола иннинээҕи үөрэхтээһин тэрилтэтэ (Амма, Өлүөхүмэ, Бүлүү, Горнай, Нам, Үөһээ Бүлүү улуустарыгар биирдии уһуйааннар) харантыыҥҥа сабыллан тураллар.

Хамсык дьаҥа бэлиэтэммит нэһилиэнньэлээх пууннарга, социальнай суолталаах тэрилтэлэр (ол иһигэр учууталлар, быраастар, полиция, уо.д.а.) үлэһиттэрин оҕолоругар анаан 62 уһуйааҥҥа дьуһуурунай бөлөхтөр үлэлииллэр (Эдьигээн – 4, Ньурба – 32, Таатта – 9, Уус Алдан – 2, Үөһээ Бүлүү – 12, Хаҥалас — 3). Онон штатнай эрэсииминэн 735 оҕо саада үлэлиир.

Билиҥҥитэ 605 оскуола үөрэнээччитэ күһүҥҥү сынньалаҥҥа олорор. Олоҕурбут көрүҥүнэн (очно) 15 оскуола, буккаас көрүҥүнэн (смешанно) 26, ыраахтан олорон (дистанционно) 3 оскуола (Аллараа Халыма, Орто Халыма, Эдьигээн улуустара) үөрэнэр.

Күн бүгүн ОРВИнан уонна гириипинэн ыалдьааччы ахсаана эбиллибитинэн сибээстээн, сэтинньи 5 күнүгэр диэри Бүлүү улууһун 1 Күүлэт оскуолата харантыыҥҥа баран, ыраахтан олорон үлэлиир.

Онтон орто анал үөрэх кыһаларын туһунан эттэххэ, 25 тэрилтэ ыраахтан олорон, 17 буккаас көрүҥүн тутуһаллар. Черскэй бөһүөлэгинээҕи (Аллараа Халыма улууһа) Арктикатааҕы хотугу норуоттар кэллиэстэрэ, Тикси бөһүөлэгинээҕи (Булуҥ улууһа) “Арктика” оробуочай каадырдары бэлэмниир киин олоҕурбут көрүҥүнэн үлэлииллэр. Эрэгийиэннээҕи тиэхиньиическэй кэллиэс (Мииринэй куоракка) 1 бөлөҕөр үөрэнэр 12 устудьуон харантыыҥҥа олороллор.

Убаастабыллаах преподавателлэр, төрөппүттэр уонна үөрэнээччилэр, хамсык дьаҥа уһуйааннарга, оскуолаларга, орто анал уонна үрдүк үөрэх тэрилтэлэригэр тарҕамматын туһугар СӨ Үөрэҕин уонна наукатын министиэристибэтэ улуустарынан күннэтэ кэтээн көрүүнү ыытар, суһал штабы үлэлэтэр.

Өскөтүн, эһиги туох эрэ ыйытыылаах эбэтэр этиилээх буоллаххытына СӨ Үөрэҕин уонна наукатын министиэристибэтин суһал линиятын нүөмэригэр + 7 (411) 242-20-69 төлөпүөннүөххүтүн сөп. Исписэлиистэр сарсыарда 9:00 чаастан киэһэ 18:00 чааска (бэнидиэнньиктэн бээтинсэҕэ диэри) ыйытыыларгытыгар хоруйдуохтара.  Итини таһынан, сайабылыанньаҕытын minobrnauki@sakha.gov.ru электроннай буочтаҕа ааккытын, төлөпүөҥҥүт нүөмэрин ыйан туран ыытыаххытын сөп.

СӨ Үөрэҕин уонна наукатын пресс-сулууспата.

+1
0
+1
0
+1
0
+1
0
+1
0
+1
0
+1
0