Саҥа үөрэх дьылын тэрийии боппуруоһун тула кэккэ министиэристибэлэр уонна биэдэмэстибэлэр бүгүн ыытыллыбыт “төгүрүк остуолга” кэпсэттилэр.
СӨ үөрэҕин уонна наукатын миниистирин бастакы солбуйааччы Ирина Любимова уһуйааннарга, оскуолаларга, орто уонна үрдүк үөрэх тэрилтэлэригэр барыларыгар үөрэх балаҕан ыйын 1 күнүттэн саҕаланыаҕын иһитиннэрдэ. “Үөрэх тэрилтэлэрэ олоҕурбут ньыманан “очно” үлэлииргэ бэлэмнэнэллэр диэн этэр.
“Бэс ыйын 30 күнүгэр Роспотребнадзор үөрэх тэрээһинин туһунан саҥа уурааҕа тахсыбыта. Онно олоҕуран, үөрэх тэрилтэлэригэр барытыгар оҕолор икки ардыларыгар 1,5 миэтэрэ социальнай дистанцияны тутуһуу ирдэбилэ баар. Суоттаан көрдөххө, ортотунан, кылааска 15 оҕо тахсар. Итинтэн сиэттэрэн, үөрэх тэрилтэлэригэр хас даҕаны моделы оҥоро сылдьабыт. Моделлар билиҥҥитэ бигэргэнэ иликтэр”, — диэн миниистири бастакы солбуйааччы edersaas.ru саайтка иһитиннэрдэ.
Оскуолаҕа аналлаах, уопсайа, 5 моделы оҥорбуттар. Моделлар оҕо ахсааныттан көрөн таҥыллыбыттар. Ол курдук, бастакы модель аҕыйах оҕолоох оскуолаҕа аналлаах. Маныаха оҕолор иккис симиэнэҕэ көспөттөр. Роспотребнадзор ирдэбилин эрэ тутуһаллара наада. Миниистири бастакы солбуйааччы этэринэн, манна өрөспүүбүлүкэ оскуолатын 60 бырыһыана хапсар эбит. Иккис моделга олоҕуран, биир симиэнэлээх оскуолалар икки симиэнэнэн үлэлииллэр. Үһүс модель икки симиэнэнэн очно-дистанционно үөрэтэри көрөр. Төрдүс, бэһис модель элбэх үөрэнээччилээх икки симиэнэнэн үлэлиир куорат оскуолаларыгар сөп түбэһэр эбит. Кылааска элбэх оҕо үөрэнэринэн сибээстээн, “очнай-заочнай” ньыманы тобулбуттар. Ол курдук, сорох кылаастар оскуолаҕа миэстэтигэр, сорохтор дистанционнайынан, атыттар сорох биридимиэттэригэр оскуолаҕа тиийэн үөрэнэллэр. Бэһис моделынан үөрэнэр оскуолалар оҕолоро атастаһа сылдьан (кылааһынан) тиийэн үөрэнэллэрин курдук оҥоһуллубут. Маныаха оскуола үс симиэнэҕэ көһөр. “Ханнык моделынан үөрэтэллэрин оскуолалар бэйэлэрэ быһаараллар. Үс симиэнэ буолла даҕаны, оҕо киэһэ хойут бүтүө диэн толкуйдуохтарын сөп. Оннук буолбатах. Уруоктар кылгаан уонна аҕыйаан биэриилэрин суотугар, үһүс симиэнэ урукку курдук 18 ч. 10 мүнүүтэҕэ түмүктэнэр, оҕолор 19 чааска дьиэлэригэр баар буолуохтаахтар. Дьокуускай куорат 17-с нүөмэрдээх оскуолата номнуо оҥордо, барытын аттарда”, — диэн быһаарда.
Ити курдук, табыгастаах хас даҕаны моделлары оҥорбуттар. Ол эрээри, Ирина Любимова, бу моделлар туһаныллыбаттарыгар эрэллээҕин, үгэс быһыытынан оскуолаҕа үөрэтэргэ бэлэмнэнэллэрин эттэ. Бүтэһиктээх быһаарыы атырдьах ыйын 20 күнүгэр ылыллыахтаах.
Людмила ПОПОВА, “Саха сирэ” хаһыат, edersaas.ru
Хаартыска: Мария ВАСИЛЬЕВА (СИА архыыбыттан).