Үөһээ Бүлүү мелиоратордара бүгүн үйэ аҥаардаах үбүлүөйдэрин бэлиэтииллэр
Үөһээ Бүлүү улууһун мелиоратордарын 50 сыллаах өрөгөйдөөх үбүлүөйдэринэн истиҥник эҕэрдэлээн туран, бэйэм тыа хаһаайыстыбатын мелиорациятыгар 55 сыл үлэлээбит киһи быһыытынан, бииргэ алтыһан ааспыт аҕа көлүөнэ биир идэлээхтэрбин ахтан-санаан ааһыахпын баҕарабын.
Кинилэр үйэ аҥаардаах үлэлэрэ мин өйбөр-санаабар илим хотоҕоһунуу субуллан ааһаллар. Үөһээ Бүлүү мелиоратордара сэбиэскэй саҕаттан дьаныардаахтык, таһаарыылаахтык үлэлээннэр, сир бөҕөнү оҥорон-тупсаран, тыа хаһаайыстыбатын производствота сайдарыгар улахан төһүү буолбуттара. Ол курдук, ааспыт үйэ 60-с сылларыгар Үөһээ Бүлүү оройуонун кылаабынай агронома Иван Герасимовтыын чугастык билсибитим. Иван Николаевич Омскайдааҕы тыа хаһаайыстыбатын институтун үөрэнэн бүтэрэн, оройуон сопхуостарын үгүс отделениеларыгар сири оҥоруу үлэтин быһаччы салайан-тэрийэн үлэлэтэрэ. Кини Үөһээ Бүлүүгэ мелиорация тэрилтэтэ төрүттэнэригэр улахан оруоллаах.
Мин өйдүүрбүнэн, ММС (массыына-мелиоративнай станция) тэриллибит маҥнайгы биир-икки сылыгар чуваш уола Павел Луданов салайбыта. Онтон Павел Николаевич Бүлүүгэ көһөн, эмиэ ММС тэрийэн, уһуннук үлэлэппитэ. Уралга биир кэмҥэ үөрэммит кыыһым Мария Колтовская Үөһээ Бүлүүгэ мелиораторынан үс-түөрт сыл бэркэ үлэлээн ааспыта. Мария Гаврильевна нивелирдээн оҥорбут бырайыактарын хойукка диэри туһаммыт этилэр.
Ол кэнниттэн элбэх киһи мелиоратордаабыта. Чуолаан, кинилэр истэриттэн Трофим Саввич Ксенофонтов отучча сыл Тыа хаһаайыстыбатын министиэристибэтигэр мелиорация салаатын салайбыта. Салгыы ММС, ПМК салайааччыларынан Алексей Максимович Петров, Гурий Иванович Григорьев, Макар Иванович Гаврильев үлэлээбиттэрэ. Өссө Үөһээ Бүлүүттэн төрүттээх Михаил Гаврильевич Донской мелиорация уонна уу хаһаайыстыбатын миниистирин бастакы солбуйааччынан олорбутун санатар тоҕоостоох. Кэлин Тыа хаһаайыстыбатын министиэристибэтин мелиорацияҕа управлениетыгар Валентин Иванович Николаев тутаах дуоһунаска үлэлээн, биир дойдулаахтарыгар элбэҕи көмөлөспүт буолуохтаах. Дойдуларыгар бэриниилээх уолаттардаах буоланнар, үөһээ бүлүүлэр Бүлүү өрүс сааскы халаанын туһанан ходуһа сирдэри нүөлсүтэр аналлаах аатырбыт «Ороһу-Ньэгэдьээк» систиэмэтин оҥостон, баччаҕа диэри туһанан кэллэхтэрэ.
Уҥаттан бастакы Мелиорация управлениетын Үөһээ Бүлүүтээҕи салаатын начаалынньыга Афанасий Бырдакаров
ТХМ Мелиорацияҕа управлениетын салайааччыта Алексей Гуляев (ортоку) — Үөһээ Бүлүү мелиоратордарыгар
Кэлин ырыынак үйэтэ тирээн кэлбит уустук быһыытыгар-майгытыгар даҕаны Үөһээ Бүлүү мелиоратордара уолуйан-чачайан ыһыллан хаалбатахтара. Ытык дьон ыччата Афанасий Валерьевич Бырдакаров салалтаны илиитигэр ылан, үлэ-хамнас тохтообокко ыытылларын көрө-истэ сылдьабын. Эдэр дьон убайдара туппут систиэмэлэрин үчүгэйдик көрөн-истэн, кэмиттэн кэмигэр өрөмүөннээн-саҥардан биэрэ сырыттахтарына, өссө даҕаны өр сылларга туһаныахтара дии саныыбын. Түмүкпэр, Үөһээ Бүлүү мелиоратордара мэлдьи үөһээ таһымҥа сылдьалларыгар, тыа хаһаайыстыбатыгар тулхадыйбат тулааһын буола туралларыгар, кинилэр үлэлэтэр эбийиэктэрэ сайын аайы быстыбат быйаҥынан, уостубат уйгунан алла турдуннар диэн алгыстаах баҕа санаабын тириэрдэбин.
Исидор ПЕТРОВ,
СӨ тыатын хаһаайыстыбатын үтүөлээх үлэһитэ, СӨ тыатын хаһаайыстыбатын туйгуна уонна бэтэрээнэ.