Бүгүн өрөспүүбүлүкэбитигэр сарсыарда аҕыс чаастан 228 быыбардыыр хампаанньа үлэлии турар. Киин быыбардыыр хамыыһыйаттан сарсыарда 10 чаастааҕы дааннайдар кэллилэр.
Өрөспүүбүлүкэҕэ, испииһэккэ киирбитинэн, 171 375 киһи быыбардыыр диэн. Онтон болдьох иннинэ 12 112 (7,07 %) киһи куоластаабыт эбит. Бүгүн сарсыарда аҕыс чаастан уоҥҥа диэри 8 459 киһи куоластаабыт. Ол аата уопсайа 20 571 киһи быыбарга номнуо кытынна. 228 быыбардыыр хампаанньанан олохтоохтор кыттыылара 12 %-ҥа тэҥнэһэр.
Билигин Дьокуускай куораттааҕы дуумаҕа Киин уокурук дьокутаатыгар быыбар буола турар. Манна регистрацияламмытынан 8 943 киһи баар, онтон 743 (8,31 %) киһитэ быыбарга кытынна. Ол иһигэр 605 (6,77 %) киһи болдьох иннинэ куоластаабыт.
Билиҥҥи туругунан, саамай көхтөөх быыбардааччылардааҕынан Үөһээ Халыма улууһа буолар. Манна 544 киһи регистрациялааҕыттан 170 (31,25 %) киһи куоластаабыт.
Оттон саамай кыра көрдөрүүлээх — Ленскэй оройуона. Манна 807 быыбардааччы баарыттан, билиҥҥитэ 29 киһи куоластаабыт.
228 быыбардыыр хампаанньаттан Хаҥаласка, Сунтаарга уонна Аммаҕа улуус баһылыгын быыбара буола турар. Маны сэргэ 103 нэһилиэккэ — баһылык, 6 оройуоҥҥа уонна 116 нэһилиэккэ — дьокутаат.
Хаартыска — Интэриниэттэн.