Үөһээ Бүлүү улууһугар коронавирус тарҕаныытын сэрэтэр улуустааҕы штаб «Инстаграм» социальнай ситимҥэ иһитиннэрбитинэн, бэҕэһээ улууска икки киһи коронавирус дьаҥыгар сутуллубут.
«Ол курдук, бэс ыйын 9 күнүгэр, Хомустаах нэһилиэгин икки олохтооҕор — 56 саастаах ийэҕэ уонна кини 27 саастаах кыыһыгар коронавирус диагноһа туруорулунна. Кыыс Дьокуускай куоракка бааҥҥа үлэлиир, ыам ыйын 31 күнүгэр уоппускатыгар дойдутугар кэлбит.
Ийэлээх кыыс бэс ыйын 3 күнүгэр тумуулаатыбыт диэннэр олохтоох балыыһаҕа көрдөрүммүттэр, бэс ыйын 4 күнүгэр анаалыс туттарбыттар. Анаалыстарын түмүгэ бэҕэһээ биллэн, билигин кинилэр инфекционнай балыыһаҕа сытан, эмтэниини ааһаллар.
Бэҕэһээ киин балыыһа эпидемиологическэй биригээдэтэ Хомустаах нэһилиэгэр тахсан, алтыспыт дьонун быһаарар үлэни ыыттылар, анаалыс ыллылар, олохтоох дьаһалта, балыыһа, ыалдьыбыт дьон олорор дьиэлэрин ыраастыыр үлэтин ыыттылар. Бүгүҥҥү күҥҥэ чугастык алтыспыт дьоннорун ахсааныгар 12 киһи баар. Балартан 5 киһи Дьокуускай куораттан таксинан бииргэ айаннаан кэлбиттэриттэн, 1 киһи — Бүлүүгэ, 2 киһи — Үөһээ Бүлүүгэ хаалбыттар. Суоппар билигин Дьокуускайга баар. Бүгүн Дьокуускай куоракка барыта 88 киһи анаалыһа ыытылынна. Түмүктэрин күүтэбит«, — диэн иһитиннэриигэ суруйбуттар.
edersaas.ru