2022 сылга эдэр дьону үлэҕэ ылар тэрилтэлэр судаарыстыба көмөтүгэр эрэнэр кыахтаахтар. Бу бырагыраама туһунан уураахха РФ бырабыыталыстыбатын бэрэссэдээтэлэ Михаил Мишустин соторутааҕыта илии баттаабыта.
30 саастарын туола илик, орто профессиональнай, үрдүк үөрэх кыһаларын саҥа бүтэрбит, уопута суох эдэр дьону уонна инбэлииттэри, тулаайахтары, кыра оҕолоох дьону үлэҕэ ылыы субсидияланар буолла.
Субсидия кээмэйэ – оройуоннай коэффициеҥҥа, страховой усунуоска уонна үлэҕэ киирбит дьон ахсааныгар төгүллэммит 3 МРОТ кээмэйигэр тэҥнэһэр. Бастакы усунуоһу үлэни биэрээччи 1 ыйынан, иккиһи – 3 ыйынан, үсүһү – 6 ыйынан ылыаҕа.
Судаарыстыба көмөтүн ылар туһуттан үлэни биэрээччи Дьарыктаах буолуу киинигэр баар вакансиялартан талыахтаах. Сайабылыанньа Социальнай страховкалааһын пуондатыгар ыытыллар. Бу миэрэ кириисис кэмигэр үлэни биэрээччилэргэ уонна эдэр исписэлиистэргэ тэҥинэн көмөлөһөр сыаллаах.
Ангелина Васильева, «Саха сирэ» хаһыат, edersaas.ru
Хаартыска: sakhagov.ru