Өрөспүүбүлүкэ ыччатын бырабыыталыстыбата премьер-миниистиргэ Андрей Тарасенкоҕа Саха сирин 100 сыллаах үбүлүөйүгэр анаабыт бырайыактарын билиһиннэрдэ. Мунньах түмүгүнэн премьер-миниистир бырайыактары туһааннаах министиэристибэлэр өйүүллэригэр эттэ.
Санатан эттэххэ, ыччат бырабыыталыстыбата уопсастыбаннай түмсүү быһыытынан СӨ бырабыыталыстыбатыгар көмө-тирэх буолар. Быйыл күһүн төрдүс састаап үлэтин саҕалаабыта. Манна барыта араас эйгэттэн 27 эдэр исписэлиис киирэн үлэлии сылдьар. Бу иннинээҕи састаап үс сыл үлэлээн былырыын Арассыыйаҕа бастыҥ ыччат бырабыыталыстыбатын, ону сэргэ бастыҥ бырайыактаах түмсүү аатын ылбыттара.
Ыччат бырабыыталыстыбата араас эйгэҕэ бырайыактарын көмүскээбиттэриттэн холобур быһыытынан аҕаллахха, кинилэр эһиил эдэр учууталларга, педагогтарга грант олохтоон улахан куонкурус тэрийээри былаанныыллар, тыа хаһаайыстыбатынан дьарыктанар эдэр дьоҥҥо анаан түмсүү тэрийэр туһунан кэпсэттилэр, ону таһынан оскуола оҕолоругар Арассыыйа киинэлэрин таһынан, сахалыы киинэлэри көрдөрөн дойдуга бэриниилээх буолууга бырайыак көмүскээтилэр.
Биир улахан бырайыактарынан Дьокуускай аэропордугар сөмөлүөккэ олорор толуоннары сахалыы моһуоннаан оҥоруу буолар. Куонкурус түмүгүнэн кыайыылаах тахсыбыт бырайыагы Дьокуускайтан көтөр авиахампаанньалар билиэттэригэр түһэриэхтэрэ.
Премьер-миниистир Андрей Тарасенко бу бырайыагы өссө тимир суол, оптуобус билиэттэригэр тарҕатарга эттэ. Ыччат бырабыыталыстыбата итини таһынан социальнай көмөҕө, эдэр ыалларга туһуламмыт бырайыактарын көмүскээтилэр.
Аграфена КУЗЬМИНА