От ыйын 1 күнүгэр Мирнэй куоракка ыытылла турар Ыччат ыһыаҕын «Урааҥхай Боотур» уонна «Эр Бэрдэ» многоборье күрэхтэһиилэрэ түмүктэннэ. edersaas.ru
Бастакы күн
«Урааҥхай Боотур» саха многоборьетын күрэхтэһиитигэр бастакы күн түмүгүнэн Нам улууһуттан Давыд Колесов «үс төгүл үс» көрүҥҥэ 31м 59 см ойон алтыс, 48-та тутум эргийэн иккис, хапсаҕайга бэһис миэстэ буолан, уопсайа 13 очукуолаах бастаан иһэр. Өлөөн улууһун бөҕөһө Айсен Семенов үс төгүл үс көрүҥҥэ 31м 29 см ойон сэттис, 41-дэ тутум эргийэн алтыс, хапсаҕайга тэҥнээҕин булбакка, бастакы миэстэ буолан, уопсайа 14 очукуолаах иккистээн иһэр. Үөһээ Бүлүүттэн Алексей Иванов 30 м 71 см ойон «үс төгүл үскэ» тохсус, 60-на тутум эргийэн бастакы, хапсаҕайга төрдүс миэстэ буолан уопсайа 14 очукуолаах, Айсен Семеновтан хаачыстыбанан баһыйтаран, үһүс миэстэҕэ иһэр. Бу күрэхтэһиигэ 31 бөҕөс күрэхтэһэ сылдьар.
«Эр Бэрдэ» күүстээхтэр күрэхтэһиилэригэр сүүрбэ түөрт киһиттэн икки көрүҥ түмүгүнэн («УАЗ» массыынаны соһуу, Чуона таастарын таһыы) уон бастыҥ киирсээччи хаалла. Оттон, үһүс көрүҥ , «арматураны токурутуу» түмүгүнэн бастыҥ уон кыттааччы миэстэлэрин быһаарыстылар. Ол курдук, Мирнэй оройуонун Садын нэһилиэгиттэн Александр Абрамов онус, Ленскай куораттан Островскай Алексей тохсус , Нам улууһуттан Ядреев Руслан ахсыс , Өлүөхүмэттэн Харбин Павел сэттис, Бүлүүттэн Михайлов Владимир алтыс, Уусуйаанаттан Алексей Козлов бэһис, Хотугулуу-Илиҥҥи федеральнай үнүбүрсүтүөт устудьуоннарын профсоюһун аатыттан киирсэр Дьулус Охлопков төрдүс миэстэ буоллулар. Оттон уопсайа 16 очукуолаах Риве Роман «УАЗ» массыынаны 24 м 02 см соһон иккис, Чуона таастарын 29 сөкүүндэ 82 дэһээтэйинэн таһан төрдүс, арматураны токурутууга онус миэстэ буолан, үсүһүнэн иһэр. Дьокуускай куораттан Кондаков Игорь «УАЗ» массыынаны 23 м 68 см соһон үһүс, Чуона таастарын 28 сөк 30 дэһээтэйинэн таһан үһүс, үс арматураны токурутан бастакы миэстэ буолан, уопсайа 7 очукуолаах иккис иһэр. Оттон Сунтаартан Рустам Ксенофонтов 24 м 14 см соһон бастакы, Чуона таастарын 28 сөк 30 дэһээтэйинэн таһан бастакы, икки арматураны токурутан иккис миэстэ буолан, уопсайа 3 очукуолаах бастаан иһэр.
Иккис күн
Иккис күҥҥэ «Урааҥхай боотур» күрэхтэһээччилэрэ мас тардыһыытыгар, 400 миэтэрэҕэ сүүрүүгэ уонна 120 киилэлээх тааһы ыраахха илдьиигэ кииристилэр. Мас тардыһыытыгар Дьокуускай куораттан Борисов Геннадий тэҥнээҕин булбата. Иккис миэстэ СПК «Урааҥхай» хамаандатыттан Ануфриев Семен буолла. Хаҥалас улууһуттан Уаров Сергей үһүстээтэ. 400 миэтэрэҕэ сүүрүүгэ барыларынааҕар быһый атахтааҕын Борисов Геннадий көрдөрдө. Кини көрдөрүүтэ 57 сөк 81 дэһээтэй. 58 сөк 17 дэһээтэй көрдөрүүлээх Хотугулуу- Илиҥҥи федеральнай үнүбүрсүтүөт устудьуоннарын профсоюһун аатыттан киирсэр Борис Сдвижков иккис буолла. Кэбээйиттэн Иннокентий Колесов 58сөк 55 дэһээтэйинэн кэлэн, үһүстээтэ.
Уопсай түмүккэ үһүс бочуоттаах миэстэни ылан, Өлөөн бөҕөһө Айсен Семенов планшетынан наҕараадаланна. Иккис миэстэ буолары ситиспит Хотугулуу-Илиҥҥи федеральнай үнүбүрсүтүөт устудьуоннарын профсоюһуттан Борис Сдвижков тэлэбиисэринэн наҕараадаланна. Муҥутуур кыайыылаах аатын сүктэ Үөһээ Бүлүүттэн Алексей Иванов уонна 150 000 солкуобайдаах сертификатынан наҕараадаланна.
«Эр Бэрдэ» күүстээхтэр күрэхтэһиилэригэр балаҕан нөҥүө таас быраҕыытыгар уонна 130 киилэлээх тааһы илдьиигэ кииристилэр. Сунтаартан Рустам Ксенофонтов балаҕан нөҥүө таас быраҕыытыгар бастакы, 130 киилэлээх тааһы ыраахха илдьиигэ бэһис буолан, уопсай түмүккэ 10 очукуоланан, муҥутуур кыайыылаах аатын сүктэ уонна 150 000 солкуобайынан наҕараадаланна. Иккис миэстэҕэ балаҕан нөҥүө таас быраҕыытыгар бэһис, 130 киилэлээх тааһы ыраахха илдьиигэ төрдүс буолан, уопсай түмүккэ 16 очукуоланан, Дьокуускайтан Игорь Кондаков таҕыста уонна тэлэбиисэринэн наҕараадаланна. «Сардаана» хамаандатыттан киирсэр Риве Роман балаҕан нөҥүө таас быраҕыытыгар уонна 130 киилэлээх тааһы ыраахха илдьиигэ иккис буолан, үһүс бочуоттаах миэстэҕэ таҕыста уонна «АЛРОСА» хампаанньа туруорбут тэлэбиисэр бирииһинэн наҕараадаланна.
Алексей Иванов (Үөһээ Бүлүү), «Урааҥхай Уолан» күрэхтэһии муҥутуур кыайыылааҕа:
— Мин анаан саха многоборьетын көрүҥнэригэр эрчиллэбин. Саха эр киһитэ эргиччи сайдыылаах буолуохтаах. Биэс сыл анараа өттүгэр тренерым Любомир Николаев многоборье дьарыгар сыһыарбыта. Кини бэйэтин уопутуттан үллэстэн, тэҥҥэ күрэхтэһиилэргэ илдьэ сылдьан дьарыктаабытыттан мин маннык ситиһиилэрдэнним. Оттон, «Урааҥхай Уолан» күрэхтэһии таһыма олус үрдүк. Элбэх күүстээх многоборецтар кэлэн кииристилэр. Бэйэм кыахпар эрэллээх этим, ол иһин итэҕэтиилээхтик кыайдым дии саныыбын.
Николай Попов, «Саха сирэ» хаһыат, edersaas.ru
Видео: Дьулустаан Трофимов