И.Е. Винокуров аатынан Хатыҥ Арыы оскуолатын баазатыгар “Айар Кут-Hollywood” хонуктаах лааҕыр үһүс сезонун өрөспүүбүлүкэ араас улуустарыттан үгүс оҕону хабан үлэлиир. Өрөспүүбүлүкэҕэ биллэр лааҕыр сүрүн сыалынан оҕо айар дьоҕурун сайыннарыы буолар.
Лааҕыры 11-с сылын Матрена Егоровна Евсеева-Мото Куо айымньылаахтык салайар. Симиэнэ аайы 20-лии иитээччи, 100-тэн тахса оҕону араас хайысхаларга дьарыктыыр. Ол курдук, үҥкүүгэ, ырыаҕа, муусука инструменнарыгар үөрэтиигэ, көрдөөхтөр уонна бэһиэлэйдэр кулууптарыгар, модельнай устуудьуйаҕа, успуорт дьарыктарыгар оҕолор сөбүлээн сылдьаллар.
Матрена Евсеева: «Бастакы сылларбытыгар Хамаҕатта саха-француз лиссиэйин лааҕырыгар баазаланан үлэбитин саҕалаабыппыт. 2015 сылтан Хатыҥ Арыы оскуолатыгар дьиэлэнэн хонуктаах лааҕыры аспыппыт. Хамсык иннинэ, сынньалаҥнарга, Соҕуруу Кэриэйэҕэ уонна Казахстаҥҥа оҕолорбутун илдьэн дьарыктыыр этибит.
Биһиги сыл устата үлэлиибит. Лааҕырбыт элбэх хайысхалаах. Оҕо бэйэтигэр эрэллээх, күүстээх санаалаах буоларын туһугар аналлаах араас дьарыктары ыытабыт. Уопсайа 30-тан тахса үлэһит, ол иһигэр 20 уһуйааччы манна олороннор, хас биирдии оҕону кытта күүстээхтик дьарыктаналлар. Эбиэт иннинэ хас да бөлөҕүнэн «Академия лидера» диэн үлэҕэ, дьиссипилиинэҕэ, сыанаҕа туттууга-хаптыыга үөрэтэр уонна сурукка-бичиккэ уһуйар “Книга памяти” диэн дьарыктаахпыт. Эбиэттэн киэһэ оҕолор бэйэлэрэ талбыт дьарыктарыгар сылдьаллар. Күн аайы эти-хааны сайыннарыыга, бэйэлэрин көрдөрүүгэ, сыанаҕа туттууга-хаптыыга, хамаанданан үлэҕэ туохха үөрэммиттэрин көрдөрөр тэрээһиннэри ыытабыт», — диэн кэпсээтэ.
Манна олохтоох нэһилиэк, социальнай өттүнэн көмөҕө наадыйар, баһаартан эмсэҕэлээбит, анал байыаннай эпэрээссийэҕэ сулууспалыыр аҕалаах ыаллар оҕолоро, биир симиэнэҕэ, ортотунан, 30-тан тахса оҕо босхо сынньанар. “Лааҕырбытыгар оҕолор хаһыс да сылын, сорохтор 4-5 сыл устата сөбүлээн дьарыктаналлар. Оҕолор икки нэдиэлэ устата сынньанаары, букатын атын киһи буолан, бэйэлэригэр эрэллэрэ күүһүрэн төннөллөр. Сезон аайы 20-лии иитээччим хаачыстыбалаах үлэни көрдөрөр, оҕоҕо оҕо саас саамай умнуллубат түгэннэрин бэлэхтиир, үлэни үрдүк таһымҥа таһаарар. Үлэһиттэр үксүлэрэ — бэйэм выпускниктарым”, — диэн Матрена Евсеева эбэн эттэ.
“Айар Кут-Hollywood” лааҕыр айымньылаах, таһаарыылаах үлэтинэн нэһилиэк, улуус аатын бүтүн өрөспүүбүлүкэ үрдүнэн ааттатар. Оҕо бу лааҕырга талаһарын биир үтүө холобурунан Саха сирин 30-тан тахса улууһуттан уонна Дьокуускай куораттан тиийэн сынньаналлара буолар. Лааҕыр былырыыҥҥыттан үлэтин сайыннаран, Дьокуускай куоракка “Айар Кут-Hollywood” оскуолатын аһан үлэлэтэр.
“Нам улууһа” МТ пресс-сулууспата