Төрүт олохтоох норуоттар аан дойдутааҕы күннэрин көрсө бүгүн куйаар ситиминэн Аҕыйах ахсааннаах хотугу норуоттар ыччаттарын VI Сугулаана ыытылынна.
edersaas.ru
Ыччат пуорума атырдьах ыйын 7-8 күннэригэр ыытыллар. Бүгүҥҥү Сугулааҥҥа өрөспүүбүлүкэ 15 улууһуттан 80-тан тахса ыччат лиидэрдэрэ, актыбыыстар кыттыыны ыллылар. Ону тэҥэ Арассыыйа эрэгийиэннэриттэн: Амурскай уобаластан, Бурятия Өрөспүүбүлүкэтиттэн, Красноярскай уонна Хабаровскай кыраайдартан кыттыыны ыллылар. Пуорум аһыллыытыгар СӨ бырабыытылыстыбатын бэрэссэдээтэлин э.т. Андрей Тарасенко кыттыыны ылла.
Кини өрөспүүбүлүкэ салалтатын аатыттан эҕэрдэ тылы этэн туран, ураты тыйыс климатическай усулуобуйалаах Саха сиригэр Уһук Илин, Сибиир аҕыйах ахсааннаах омуктарын 15 % олорор диэн бэлиэтээтэ.
СӨ Бырабыытылыстыбатын салайааччыта бэйэтин үлэтин Аҕыйах ахсааннаах норуоттары өйүүр кэпсиитиигэ кыттыһан, ыччат санаатын истэн саҕалаабытын, СӨ Аҕыйах ахсааннаах омуктарын бырааптарын боломуочунайа Лена Иванова бэлиэтээтэ. Кини «социальнай суолталаах бырайыактары олоххо киллэриигэ өрөспүүбүлүкэ салалтатын кытта бииргэ үлэлээһин олуга уурулунна» диэн эттэ.
Сарсын пуорум улуустартан кыттар ыччаттар бырайыактарын ырытыахтара, уопсастыбаннай тэрилтэлэр граннарга кыттыыларын сүбэлэһиэхтэрэ, төрөөбүт тылы үөрэтиигэ уонна харыстааһыҥҥа өйөбүл туһунан кэпсэтиэхтэрэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — Андрей Сорокин, СИА.