Уопсастыба

Ыччат парламенын бэрэссэдээтэлэ Антон Васильев Арассыыйа бэрэсидьиэнин мэтээлин тутта

СӨ Ыччат парламенын бэрэссэдээтэлэ Антон Васильев Арассыыйа бэрэсидьиэнэ  Владимир Путин өйдөбүнньүк мэтээлинэн уонна «За бескорыстный вклад в организацию Общероссийской акции взаимопомощи #Мывместе» диэн грамотатынан наҕараадаланна. Киниэхэ СӨ Бырабыыталыстыбатын бэрэссэдээтэлин солбуйааччы Ольга Балабкина туттарда.

Бу туһунан Ыччат парламенын бэрэссэдээтэлэ Антон Васильев санаатын үллэһиннэ:

— Коронавирус дьаҥын кэмигэр 2020 сыл сайыныгар доҕотторбун кытта арыый санааны көтөҕөр контент оҥорорго быһаарыммыппыт. «Саха» НКИХ өйөбүлүнэн айар бөлөх тэринэн бастакы бырайыактарбытын толкуйдаабыппыт. Айар бөлөхпүтүн “AYAR” диэн ааттаабыппыт. Ол курдук, хас да бырайыактан талан хас бээтинсэ ахсын тахсар “Күөрчэх шоу” биэрии олохтоммута. Инньэ гынан көхтөөх ыччаты түмэн биэриибитин оҥорон саҕалаабыппыт. Манна биллэр-көстөр эрэ дьону буолбакка, көхтөөх ыччаты ыҥыран кинилэр уопсастыбаннай бырайыактарын, коронавирус дьаҥын кэминээҕи олохторун туһунан кэпсэтиилэри устубуппут.

Билиҥҥи ыччат чаҕылхай хартыыналары астынар, ол иһин биэриилэрбитин оонньуу гына устубуппут. Билигин биһиги икки  бырайыакка үлэлэһэбит — «AYAR SHOW» уонна “Я-молодой” диэн. Онон үлэбит билигин да күөстүү оргуйар. Мэтээл уонна грамота «МыВместе” диэн норуоттар икки ардыларынааҕы бириэмийэ призера буолбуппутунан кэллэ. Итинник бириискэ тиксиэхпит диэн санаа суох этэ. Соһуйдубут да, үөрдүбүт да.

Ульяна ЗАХАРОВА.

0
0
Telegram @edersaas20