Бу дьыл алтынньы 1-8 күннэригэр Ил Түмэн иһинэн үлэлиир Ыччат парламенын састаабыгар хандьыдааттарын талыыга сайаапка хомуллар.
Ил Түмэн иһинэн Ыччат парламена сүбэлэһэр, мунньахтыыр уорган, парламент иһинэн бүтүн өрөспүүбүлүкэ оройуоннарын түмсүүлэрин, бэрэстэбиитэллэрин уонна тэрилтэлэрин түмэр. Парламент сүрүн соругунан ыччат көҕүлээһиннэрин өйүүр, үлэтин-хамнаһын өрөспүүбүлүкэ былааһыгар тиэрдэр уорган буолар. Ыччат парламенын бэрэссэдээтэлинэн Антон Анатольевич Васильев буолар. Кини «Айар» диэн «Саха» НКИК иһинэн үлэлиир түмсүү салайааччыта, ыччат бырайыактарын продюсера.
Ыччат парламенын састаабыгар 60 чилиэннээх, өрөспүүбүлүкэ 28 оройуонун хабан үлэлиир. Аҕыс кэмитиэттээх: социальнай көмүскэл, наука, үөрэҕирии, ыччат дьыалаларын уонна успуорт физическэй култуураҕа, судаарыстыбаннай тутуу уонна сокуон, эрэгийиэннээҕи сайдыы уонна айылҕаны туһаныы, Арктика сайдыытын уонна хотугу норуоттар дьыалаларын кэмитиэттэрэ.
Сайаапканы хайдах түһэриэххэ сөбүй?
Куонкурустаах сүүмэрдээһиҥҥэ РФ олохтооҕо, Саха сиригэр олорор 14-35 диэри саастаах ыччат биэрэр кыахтаах. Куонкурус сүүмэрдээһинэ икки түһүмэҕинэн ааһар. Илиилэринэн толоруллубут анкыатаны уонна бэриллибит тиэмэлэргэ эссе суруйан PDF фуормаҕа molparlament14@mail.ru ыытыллар.
Эссе тиэмэлэрэ
— Аныгы уопсастыбаҕа ыччат оруола
— СӨ судаарыстыбаннаһа — РФ састаабыгар сайдыыта
— Мин сокуон барылын оҥорууга көҕүлээһиним.
Сүүмэрдээһин иккис түһүмэҕэ парламент бырагырааматын тула кэпсэтии быһыытынан барар.
Куонкурус сүүмэрдээһинин тэрийээччилэр хандьыдааттар испииһэктэрин быһаарыахтара. Ол түһүмэх ахсын ким хас баалы ылбытынан сыаналаныаҕа. Бу туһунан барыта Ыччат парламенын сайтыгар уонна Инстаграм ситимгэр сырдатыллыаҕа.
Ульяна ЗАХАРОВА, edersaas.ru