СӨ Ыччат миниистирэ Степан Саргыдаев бүгүн, тохсунньу 28 күнүгэр, быһа сибээскэ киирбит ыйытыыларга хоруйдары биэрдэ.
Кэпсэтиигэ устудьуоннар тутар эрээттэрин, 2020 сылга үлэлэрин түмүгүн ыйыттылар. Онуоха миниистир үлэ түмүгэ үчүгэйин бэлиэтээтэ.
—Быйыл коронавирус дьаҥа туран, эпидемиологическай балаһыанньанан, тутууга үлэһит илии тиийбэт кыһалҕатын боппуруоһа сытыытык турбута. Итиниэхэ устудьуоннар ыстааптара бу боппуруоска болҕомтотун, кыһамньытын ууран кыттыста, үлэлээтэ. Ол түмүгэр, устудьуоннар социальнай хайысхалаах тутууларга сэтинньи саҥатыгар диэри үлэлэһэн бэйэлэрин кылааттарын киллэристилэр. Кинилэр оскуолалары, уһуйааннары тутустулар. Сайын, күһүн Дьокуускай куораты тупсарыы үлэтигэр көхтөөхтүк кытыннылар. Ону сэргэ, улуустарга искибиэрдэри, пааматынньыктары саҥардыыга, тупсарыыга көмөлөстүлэр. Онон 2020 сылга биһиги ыччаттарбыт, устудьуоннар этэрээттэрэ өрөспүүбүлүкэ социальнай-экэнэмиичэскэй сайдыытыгар бэйэлэрин кылааттарын киллэристилэр, — диэтэ.
Манна даҕатан кини СӨ Үөрэх министиэристибэтин кытары кыттыһан табыгастаах усулуобуйаны тэрийэргэ бары кыһамньыларын уурбуттарын эттэ.
—Үлэ кыһыннары салҕанар. Тыһыынчанан устудьуон араас хайысхаларынан бэлэмнэниэ. Анал куурустарга үөрэммиттэрин туоһулуур сибидиэтэлистибэлэри тутуохтара. Куурустарга ыччаттар куйаар ситиминэн үөрэниэхтэрэ. Онтон салгыы муус устарга уонна ыам ыйыгар квалификационнай эксээмэннэрин туттарыахтара, — диэн эбэн эттэ.
Түмүккэ миниистир эдэр ыччаты устудьуоннар тутар этэрээттэрин эрэгийиэннээҕи ыстаабын саайтыгар киирэллэригэр, сиһилии быһаарыыны ааҕалларыгар ыҥырда. Устудьуоннар этэрээттэригэр кыттыһыҥ диэтэ.
Хаартыска: СИА архыыбыттан ылылынна