Учуутал идэлээх тыа сирин олохтооҕо бэҕэһээҥҥи Анал этиини хайдах сыаналыыр эбитий? Тугу кэрэхсээтэ? Томпо улууһун Кириэс Халдьаайы орто оскуолатын учуутала, СӨ үөрэҕириитин уонна ыччат бэлиитикэтин туйгуна Ирина Харайданова Анал этиини маннык сыаналаата:
— Өрөспүүбүлүкэбит Ил Дархана Айсен Николаев Ил Түмэҥҥэ туһаайыытыгар тыа сирин олохтоохторугар сыһыаннаах этиилэрин сэргээтим. Чааһынай хаһаайыстыбалаах дьон барыта кэпэрэтиип нөҥүө барыа диэни сорох ылынар, сорох ылыммат. Олох ирдэбилинэн хардыылаан иһэрбит ордук буолуо. Билигин ынах сүөһү ахсаана аччыы турар кэмигэр бэриллэр социальнай көмөнү, үрүҥ илгэ бородууксуйатын оҥорон таһаарыыга киирэр уларыйыы, үүтү туттарыыга көрүллэр субсидия тыа сирин олохтоохторо, кэлэр сылга этиллэр 47 бырыһыан үрдүк дохуоту ылар буоллахтарына, кырдьык даҕаны, тыа хаһаайыстыбатын сайдарыгар улахан күүс буолуо.
Биһиги өрөспүүбүлүкэбит 20 % нэһилиэнньэтэ тиийиммэт-түгэммэт олохтоох. Ити, биллэн турар, тыа сиригэр үлэ, дьарык суоҕуттан мэлдьи баар буолуоҕа. Тыа сиригэр дьарыктаах буолууга, бу хамсык кэмигэр, 2000-н тахса кэриҥэ дьону үөрэттэрэн, кэлии дьон үлэлээбит үлэлэрин саха ыччата кыайарын Ил Дархаммыт Айсен Николаев итэҕэттэ. Онон, олохтоох дьон тутуу, бырамыысыланнас өттүгэр үлэни хото тутарыгар, онно үөрэнэргэ кыах бэриллэр кэмэ кэллэ. Бу кэми мүччү туппакка эрэ, олохтоох дьаһалта баһылыктарын өйөбүлэ күүһүрүөн наада. Саха сатаабатаҕа суох дииллэр, онон ыччат чаҕыйбакка, сытыытык, анал бырайыактарга киирсэн истэр ханнык. Туһаайыыга этиллибит барыта этэҥҥэ олохтоох дьон туһатыгар буоллар ханнык диэн эрэнэбин.
Бэлэмнээтэ Женни Стрюкова, edersaas.ru
Хаартыска: И.Харайданова (бэйэтэ тиксэрдэ)