Уопсастыба Эдэр саас

Ыччат бырабыыталыстыбата Арассыыйаҕа үс бастыҥҥа киирдэ

СӨ Ыччат бырабыыталыстыбата  Арассыыйаҕа бырайыагы салайыы куонкуруһугар үс бастыҥнар ахсааннарыгар киирдэ диэн үөрүүлээх сонун кэллэ.


РФ бырабыыталыстыбатын аналитикаҕа киинигэр  бэҕэһээ, а.э. сэтинньи 26 күнүгэр,  «Проектный Олимп» куонкурус  «Молодежные проектные офисы» номинацияҕа түмүгэ буолла. Бу улахан түһүлгэҕэ ыытыллыбыт күөн күрэскэ Саха сирин  аатыттан Ыччат бырабыыталыстыбата кытынна итиэннэ иккис бочуоттаах миэстэни ылары ситистэ! Үс бастыҥ иһигэр биһиги ыччаттарбыт хамаандаларын сэргэ,  Саратов уонна Воронеж уобаластарын  хамаандалара киирэн улаханнык үөрдүлэр.

СӨ Ыччат бырабыыталыстыбатын бэрэссэдээтэлэ, хамаанда хапытаана Василина Лукина:

—Куонкуруска аан бастаан кыттаат, маннык ситиһиилэммиппититтэн наһаа үөрдүбүт.  Эспиэрдэр үлэбитин үрдүктүк сыаналаатылар. Бырайыагы салайыы эйгэтигэр биһиги үөрүйэхпит төһө да кыратын иһин, хамаанданан биир сомоҕо буолан тапсан үлэлээһин түмүгэр  призердар ахсааннарыгар киирдибит, — диэн үөрүүтүн үллэһиннэ.

Манна даҕатан эттэххэ, РФ бырабыыталыстыбатын аналитикаҕа киинэ  «Проектный олимп» куонкуруһу алтыс сылын үрдүк таһымнаахтык, өрө көтөҕүллүүлээхтик тэрийэн ыытар.  Бу куонкурус бырайыагы салайыы күрэһигэр биир саамай суолталаахтара.

СӨ Ыччат бырабыыталыстыбатын хамаандата СӨ бырайыагы салайар департамеҥҥа, СӨ ыччат дьыалатыгар  уонна социальнай коммуникацияҕа министиэристибэтигэр, СӨ Ил Дарханын уонна бырабыыталыстыбатын дьаһалтатын каадыр бэлиитикэтигэр, судаарыстыбаннай уонна муниципальнай сулууспаҕа  департаменыгар  улахан махталын тиэртэ.

0
0
Telegram Whatsapp

Добавить комментарий